រដ្ឋសមាជិក ណាតូ មួយចំនួនមិនចង់ឲ្យសង្គ្រាមនៅ អ៊ុយក្រែន បញ្ចប់ទេ

បើតាមរដ្ឋមន្ត្រីការបរទេសតួកគីបាននិយាយកាលពីថ្ងៃពុធថា រដ្ឋសមាជិកអង្គការណាតូមួយចំនួនចង់ឲ្យសង្រ្គាមនៅអ៊ុយក្រែនបន្ត ដើម្បីឲ្យរុស្ស៊ីកាន់តែចុះខ្សោយ ។

នៅក្នុងបទសម្ភាសន៍ជាមួយទូរទស្សន៍ឯកជន CNN Turk លោក Mevlut Cavusoglu រដ្ឋមន្ត្រីការបរទេសតួកគីបាននិយាយថា ដំបូងឡើយតួកគីគិតថា សង្រ្គាមរុស្ស៊ី និងអ៊ុយក្រែននឹងមិនអូសបន្លាយពេលយូរនោះទេ បន្ទាប់ពីកិច្ចចរចាសន្តិភាពនៅទីក្រុងអ៊ីស្តង់ប៊ុល ។

លោក Cavusoglu បាននិយាយថា “ប៉ុន្តែបន្ទាប់ពីកិច្ចប្រជុំរដ្ឋមន្ត្រីការបរទេសរបស់អង្គការណាតូ វាជាការចាប់អារម្មណ៍ថ្មីថា មានប្រទេសមួយចំនួននៅក្នុងរដ្ឋសមាជិកណាតូមិនចង់ឲ្យសង្រ្គាមអ៊ុយក្រែនបញ្ចប់ទេ ដោយចង់ឲ្យការលុកលុយមួយនេះបន្ត ហើយវានឹងធ្វើឲ្យរុស្ស៊ីខ្សោយទៅៗ” ។

ទន្ទឹមនោះលោក Cavusoglu បានបញ្ជាក់ថា ចំណែកប្រធានាធិបតីតួកគីលោក Recep Tayyip Erdogan ក៏កំពុងមានទំនាក់ទំនងឥតឈប់ឈរទាំងជាមួយលោក Vladimir Putin និងលោក Volodymyr Zelenskyy ។

លោកបានបន្ថែមថា “លោកប្រធានាធិបតី Erdogan នឹងនិយាយទៅកាន់មេដឹកនាំទាំងពីរម្តងទៀតនៅថ្ងៃខាងមុខ ខណៈខ្ញុំផ្ទាល់ក៏បាននិយាយជាមួយរដ្ឋមន្ត្រីការបរទេសរុស្ស៊ីលោក Sergey Lavrov និងជាមួយរដ្ឋមន្ត្រីការបរទេសអ៊ុយក្រែនលោក Dmytro Kuleba ផងដែរ” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ដាក់ទាហានស៊ីឈ្នួលបរទេសដល់ទៅ ២ ម៉ឺននាក់ក្នុងសង្គ្រាមអ៊ុយក្រែន ដំណាក់កាលថ្មី