មេ​ដឹក​​នាំ​ចិន​ លោក​ ស៊ី ស្នើ​​គំនិត​​​ផ្តួច​ផ្តើម​​សន្តិសុខ​​សកល​ តែ​មិន​ផ្តល់​​លំអិត​

កាលពីថ្ងៃព្រហស្បតិ៍ ប្រធានាធិបតីចិន លោក ស៊ី ជិនពីង បានស្នើ«គំនិតផ្តួចផ្តើមសន្តិសុខសកលមួយ»ដើម្បីប្រកាន់យកគោលការណ៍សន្តិសុខដែលមិនអាចបំបែកបាន ដែលជាគោលគំនិតមួយត្រូវបានគាំទ្រដោយរុស្ស៊ី ប៉ុន្តែលោកមិនបានផ្តល់សេចក្តីលំអិតថាតើគួរអនុវត្តបែបណានោះទេ។

អំឡុងពេលសុន្ទរកថាជាវីដេអូមួយទៅកាន់វេទិកាអាស៊ី Boao Asia Forum ប្រចាំឆ្នាំ លោក ស៊ី មានប្រសាសន៍ថា ពិភពលោកគួរតែគោរពអធិបតេយ្យភាព និងបូរណភាពទឹកដីនៃប្រទេសទាំងអស់ ហើយយកចិត្តទុកដាក់លើ«សន្តិសុខស្របច្បាប់របស់យើងទាំងអស់គ្នា»។

លោកបន្តប្រាប់វេទិកាដែលរៀបចំនៅកោះហៃណាន ភាគខាងត្បូងប្រទេសចិនថា ៖«យើងគួរប្រកាន់គោលការណ៍នៃសន្តិសុខដែលមិនអាចបំបែកបាន កសាងស្ថាបត្យកម្មប្រកបដោយតុល្យភាព ប្រសិទ្ធភាព និងនិរត្តរភាព ព្រមទាំងប្រឆាំងនឹងការកសាងសន្តិសុខជាតិលើមូលដ្ឋាននៃអសន្តិសុខក្នុងប្រទេសដទៃ»។

ក្នុងកិច្ចពិភាក្សាជុំវិញសង្គ្រាមនៅអ៊ុយក្រែន ប្រទេសរុស្ស៊ីបានទទួចឲ្យបណ្តារដ្ឋាភិបាលប្រទេសលោកខាងលិចគោរពកិច្ចព្រមព្រៀងឆ្នាំ១៩៩៩ដោយផ្អែកលើគោលការណ៍នៃសន្តិសុខមិនអាចបែកបានដែលគ្មានប្រទេសណាអាចពង្រឹងសន្តិសុខរបស់ខ្លួនតាមរយៈការចំណាយពីអ្នកដទៃនោះទេ។

ចិន និងរុស្ស៊ី មានទំនាក់ទំនងជិតស្និទ្ធ ហើយចិនក៏បានបដិសេធថ្កោលទោសចំពោះការវាយប្រហាររបស់រុស្ស៊ីលើអ៊ុយក្រែនដែលបានចាប់ផ្តើមតាំងពីថ្ងៃទី២៤ ខែកុម្ភៈ ខណៈរដ្ឋាភិបាលក្រុងមូស្គូបានអះអាងថា សកម្មភាពរបស់ខ្លួនគឺជា«ប្រតិបត្តិការពិសេស»ដើម្បីធ្វើឲ្យគ្មានអាវុធនៅអ៊ុយក្រែន។ ចិនបានបន្ទោសសង្គ្រាមនៅអ៊ុយក្រែនដោយសារតែការពង្រីកខ្លួនទៅកាន់ភាគខាងកើតរបស់អង្គការណាតូ។

លោកប្រធានាធិបតី ស៊ី បាននិយាយថា កិច្ចខិតខំប្រឹងប្រែងគឺចាំបាច់ដើម្បីធ្វើឲ្យមានស្ថេរភាពចង្វាក់ផ្គត់ផ្គង់សកល ប៉ុន្តែក៏បានបញ្ជាក់ថា សេដ្ឋកិច្ចរបស់ចិនរឹងមាំ និងមាននិន្នាការយូរអង្វែងដែលមិនអាចផ្លាស់ប្តូរនោះទេ។

លោក Jude Blanchette អ្នកជំនាញចិននៅមជ្ឈមណ្ឌលសម្រាប់ការសិក្សាយុទ្ធសាស្ត្រអន្តរជាតិនៅទីក្រុងវ៉ាស៊ីនតោន បាននិយាយថា សំដីរបស់លោកប្រធានាធិបតី ស៊ី ជិនពីង ទំនងជាប៉ុនប៉ងដាក់បញ្ចូលធាតុដែលមានស្រាប់នៃគោលនយោបាយការបរទេសរបស់ចិនជាដំណោះស្រាយចំពោះអស្ថិរភាពពិភពលោកនាពេលបច្ចុប្បន្ន៕

ប្រែសម្រួល៖ វីរបុត្រ
ប្រភព៖ Reuters