ស្ថានកុងស៊ុល រុស្ស៊ី ប្រចាំទីក្រុងញូវយ៉ក រងការគំរាមបំផ្ទុះគ្រាប់បែក

អគ្គកុងស៊ុលស្តីទីលោក Vyacheslav Slavkin បានប្រាប់សារព័ត៌មាន Sputnik ថា ស្ថានកុងស៊ុលរុស្ស៊ីនៅទីក្រុងញូវយ៉កត្រូវបានគំរាមកំហែងដោយការបំផ្ទុះគ្រាប់បែកជាប្រភេទស្រាក្រឡុក Molotov ។

លោក Slavkin បាននិយាយថា “យើងទទួលបានការគំរាមកំហែងជារៀងរាល់ថ្ងៃតាមរយៈអ៊ីមែល និងការហៅទូរស័ព្ទជាភាសារុស្សី និងភាសាអង់គ្លេស ។ មានពេលមួយយើងត្រូវបានគេប្រាប់ថា យើងនឹងត្រូវបានបំផ្ទុះគ្រាប់បែកជាប្រភេទដបស្រាក្រឡុក Molotov ។ មួយទៀតកាលពីសប្តាហ៍មុន យើងបានទទួលសារអំពីការបង្កប់គ្រាប់បែកផងដែរ” ។

លោក Slavkin បានបញ្ជាក់ថា វិធានការសន្តិសុខត្រូវបានណែនាំនៅស្ថានកុងស៊ុល បន្ទាប់ពីការគំរាមកំហែងខ្លាំង ខណៈការផ្ញើអ៊ីមែល និងការហៅទូរស័ព្ទគំរាមកំហែង ក៏ដូចជាការតវ៉ាប្រឆាំងរុស្ស៊ីត្រូវបានធ្វើឡើងនៅជិតអគារកុងស៊ុលជារៀងរាល់ថ្ងៃ ។

ទន្ទឹមនោះ ប៉ូលិសញូវយ៉កក៏ត្រូវបានចាត់តាំងឲ្យផ្តល់សន្តិសុខយាមកាមពេញម៉ោង ហើយត្រូវជូនដំណឹងអំពីការគំរាមកំហែងណាមួយប្រឆាំងនឹងអគារ ក៏ដូចជាបុគ្គលិករបស់ស្ថានកុងស៊ុលផងដែរ ។

គួរបញ្ជាក់ថា ការិយាល័យការទូតរុស្ស៊ីនៅទូទាំងទ្វីបអឺរ៉ុប និងអាមេរិកខាងជើងបានប្រឈមមុខនឹងកម្រិតគំរាមកំហែងកាន់តែខ្លាំងក្នុងរយៈពេល ២ ខែចុងក្រោយនេះ ចំពេលមានវិបត្តិនៅអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ឆេះវិទ្យាស្ថានស្រាវជ្រាវ អាវុធ សម្ងាត់ កំពូលរុស្ស៊ី ខណៈមានដំណឹងថា អ្នកវិទ្យាសាស្រ្តឈានមុខមួយចំនួន បាត់បង់ជីវិត