ព័ត៌មានអន្ដរជាតិ

នារីម្នាក់ ងប់ងុលនឹង Jimin ពេក រហូតវះកាត់មុខ ២០ ដង ឲ្យដូចកូរ៉េ (មានវីដេអូ)

បានផុស

៣ years មុន

នៅ

ថ្ងៃព្រហស្បតិ៍ ២៨ មេសា ២០២២

ដោយ

Oli London ជាជនជាតិអង់គ្លេសអាយុ ៣២ឆ្នាំ នាងបានធ្វើការវះកាត់កែសម្ផស្សចំនួន២០លើក ដើម្បីកែទម្រង់មុខឲ្យដូចជាតារា K-pop ដ៏ល្បីមួយរូបគឺ Jimin សមាជិក BTS។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាងបង្ហើបថា បានចំណាយប្រាក់ជាង ២៥០,០០០ ដុល្លារ ដើម្បីផ្លាស់ប្តូរមុខមាត់ឲ្យមើលទៅដូច Jimin ហើយភាពជ្រុលនិយមរបស់ Oli ដើម្បីចង់ក្លាយជាជនជាតិកូរ៉េ វាបានកើតឡើងបន្ទាប់ពីនាងក្លាយជាគ្រូបង្រៀនភាសាអង់គ្លេសនៅកូរ៉េខាងត្បូងក្នុងឆ្នាំ ២០១៣ ហើយចាប់អារម្មណ៍លើវប្បធម៌កូរ៉េជាខ្លាំង។ ចាប់ពីពេលនោះហើយ ដែលធ្វើឲ្យនាងស្គាល់តន្ត្រី K-pop ហើយឆ្កួតនឹង Jimin និងចាប់ផ្ដើមធ្វើការវះកាត់លើផ្ទៃមុខ តាំងពីឆ្នាំនោះ។

នៅពាក់កណ្តាលឆ្នាំ ២០២១ Oli បានប្រកាសនៅលើប្រព័ន្ធផ្សព្វផ្សាយសង្គម បន្ទាប់ពីឆ្លងកាត់មុខកាំបិតជិត ២០ ដង នាងនិយាយថា នាងបានផ្លាស់ប្ដូរខ្លួនឯងទៅជាជនជាតិកូរ៉េ។ ទន្ទឹមនោះ ក៏មានការមិនពេញចិត្ត និងមតិអវិជ្ជមានជាច្រើនរហូតឈានដល់គំរាមកំហែងដល់ស្លាប់។ ជាពិសេស ARMY របស់ BTS បានចេញមុខរិះគន់ និងសើចចំអកចំពោះអាកប្បកិរិយាចម្លែករបស់នាង។

Oli បាននិយាយថា “មានមនុស្សច្រើនណាស់ ដែលស្អប់ខ្ញុំ និងអ្នកលេងអ៊ីនធឺណែតជាច្រើន ដែលតែងតែនិយាយថាខ្ញុំមិនអាចជាជនជាតិកូរ៉េ។ ដោយសារតែខ្ញុំមិនបានធ្វើការវះកាត់កែសម្ផស្សលើរាងកាយទាំងមូល ខ្ញុំគិតថាប្រហែលជាពួកគេនិយាយត្រឹមត្រូវ។ ខ្ញុំប្រហែលជាមិនទាន់ក្លាយជាជនជាតិកូរ៉េ ១០០ភាគរយនៅឡើយទេ ” ។

នៅដើមឆ្នាំ ២០២២ នាងបានប្រកាសពីផែនការសម្រាប់ការវះកាត់មួយផ្សេងទៀត។ នេះជាជំហានចុងក្រោយ ដែលជាការកាត់បន្ថយទំហំលិង្គដល់ប្រវែងមធ្យមរបស់បុរសកូរ៉េ និងមានគេទទួលស្គាល់ថា ជាកូរ៉េ១០០ភាគរយ។

យ៉ាងណាមិញ គម្រោងវះកាត់ចុងក្រោយរបស់នាង ត្រូវបានគេរិះគន់យ៉ាងខ្លាំងនៅលើបណ្ដាញសង្គម ដោយនិយាយថា វាជាទង្វើមិនគប្បី ហើយក៏ជំរុញឲ្យមានចំណាប់អារម្មណ៍មិនពិត អំពីបុរសអាស៊ីខ្លះថា នាងបានធ្វើឲ្យវប្បធម៌កូរ៉េ កាន់តែគួរឲ្យស្អប់ខ្ពើមខ្លាំង៕

សូមទស្សនាវីដេអូ

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖ឌីជេ សូដា ត្រូវបង្ខំឲ្យស្រាតខោចេញ ពេលកំពុងជិះយន្តហោះ (មានវីដេអូ)

ចុចអាន៖តារាជួរមុខកូរ៉េ ២ ដួង ពាក់គ្រឿងអលង្ការក្មេងៗក្នុងកម្មវិធី រហូតធ្វើឲ្យអ្នកគាំទ្រសម្រុកទិញអស់ពីស្តុក