លោក ពូទីន ព្រមានវាយប្រហារលឿនដូចផ្លេកបន្ទោរ បើប្រទេសណា ធ្វើអន្តរាគមន៍ក្នុងជម្លោះអ៊ុយក្រែន (មានវីដេអូ)

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានព្រមានបរទេស ប្រឆាំងនឹងការព្យាយាមធ្វើអន្តរាគមន៍ក្នុងជម្លោះនៅអ៊ុយក្រែន និងបង្កការគំរាមកំហែងជាយុទ្ធសាស្ត្រសម្រាប់រុស្ស៊ី ដោយលោកប្តេជ្ញាថា ទីក្រុងមូស្គូនឹងឆ្លើយតបជាមួយនឹងការវាយប្រហារលឿនដូចផ្លេកបន្ទោរ។

លោកពូទីននិយាយថា “យើងមានឧបករណ៍ទាំងអស់សម្រាប់រឿងនេះ។ ប្រភេទឧបករណ៍ ដែលគ្មាននរណាម្នាក់អាចអួតបាន ហើយយើងនឹងមិនអួតទេតែយើងនឹងប្រើវាប្រសិនបើចាំបាច់”។

ស្របពេលជាមួយគ្នានោះ លោកពូទីន បានបន្តចោទប្រកាន់មហាអំណាចបរទេស​ ពីការជំរុញអ៊ុយក្រែនឆ្ពោះទៅរកការប្រឈមមុខដាក់គ្នាដោយផ្ទាល់ជាមួយរុស្ស៊ី ហើយបានកត់សម្គាល់ថា ផែនការសម្រាប់ការវាយប្រហារលើសាធារណរដ្ឋ Donbass និង Crimea ត្រូវបានពិពណ៌នានៅក្នុងគោលលទ្ធិរបស់អ៊ុយក្រែននាពេលថ្មីៗនេះ។ ប្រទេសលោកខាងលិចបានប្រើភាពស្អប់ខ្ពើមរុស្ស៊ី និងគោលគំនិតណាស៊ី ដើម្បីប្រែក្លាយអ៊ុយក្រែនទៅជាការប្រឆាំងរុស្ស៊ី។

លោកបន្ថែមថា “សត្រូវរបស់យើង បានជំរុញឲ្យមានការលេចចេញនូវអាវុធភូមិសាស្ត្រនយោបាយថ្មីមួយ។ តាមពិតទៅ វាមិនមែនជារឿងថ្មីទេ ប៉ុន្តែវាពិតជាបានផ្តល់ឲ្យអ៊ុយក្រែន នូវកម្លាំងថ្មី សន្ទុះថ្មី”។

គួររម្លឹកថា លោកពូទីន បានបញ្ជាឲ្យចាប់ផ្តើមប្រតិបត្តិការយោធាពិសេសនៅក្នុងប្រទេសអ៊ុយក្រែនកាលពីថ្ងៃទី២៤ខែកុម្ភៈ ដោយលើកឡើងពីសំណើសុំជំនួយពីសាធារណរដ្ឋប្រជាមានិត Donetsk និង Lugansk ដោយសារតែទីនោះរងការបាញ់ផ្លោងកាន់តែខ្លាំងពីយោធាអ៊ុយក្រែន។ លោកប្រធានាធិបតីអះអាងថា ប្រតិបត្តិការនេះត្រូវបានចាប់ផ្តើម ដើម្បីបញ្ចប់ភាពឈឺចាប់របស់ប្រជាជន Donbass រយៈពេលប្រាំបីឆ្នាំ៕

សូមទស្សនាវីដេអូ៖

ប្រែសម្រួល Vann Vann

ប្រភព៖ Sputnik

ចុចអាន៖ លោក Zelensky ធ្វើរឿងភ្ញាក់ផ្អើលក្នុងមន្ទីរពេទ្យ ដាក់កុមារកំព្រា ដោយសាររុស្ស៊ី ទម្លាក់គ្រាប់បែក