ព័ត៌មានអន្ដរជាតិ

ការធ្វើតេស្តមីស៊ីលកំពុងល្អ លោក គីម អំពាវនាវឲ្យបង្កើនយោធាកាន់តែខ្លាំង

បានផុស

៣ years មុន

នៅ

ថ្ងៃសុក្រ ២៩ មេសា ២០២២

ដោយ

មេដឹកនាំប្រទេសកូរ៉េខាងជើង លោក គីម ជុងអ៊ុន បានអំពាវនាវដល់កម្លាំងយោធារបស់ខ្លួនឲ្យខិតខំបង្កើនសមត្ថភាពលើគ្រប់មធ្យោបាយដើម្បីកម្ចាត់សត្រូវ។ នេះបើតាមការផ្សាយរបស់សារព័ត៌មានរដ្ឋនៅថ្ងៃសុក្រ ទី២៩ ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គីម ជុងអ៊ុន បានធ្វើការអំពាវនាវអំឡុងពេលថតរូបជុំគ្នាជាមួយកងកម្លាំងប្រដាប់អាវុធ ក្រុមការងារផ្សព្វផ្សាយរដ្ឋ និងអ្នកពាក់ព័ន្ធផ្សេងទៀតនៅក្នុងពិធីដង្ហែវិស័យយោធាដ៏មហាសាលកាលពីថ្ងៃចន្ទ ដើម្បីអបអរខួបលើកទី៩០នៃការបង្កើតកងកម្លាំងប្រដាប់អាវុធរបស់ខ្លួន។

រូបថតបានចេញផ្សាយដោយប្រព័ន្ធផ្សព្វផ្សាយរដ្ឋបានបង្ហាញថា លោក គីម ជុងអ៊ុន ស្ថិតនៅលើសេះស និងពាក់ឯកសណ្ឋានយោធាដែលមានអាវសជាមួយខោពណ៌ទឹកប៊ិចនៅពេលលោកត្រួតពិនិត្យកម្លាំងប្រដាប់អាវុធ។

ពិធីដង្ហែវិស័យយោធាកាលពីថ្ងៃចន្ទបានបង្ហាញមីស៊ីលថ្មីៗបំផុតជាច្រើនរាប់ទាំងមីស៊ីលអន្តរទ្វីប (ICBM), មីស៊ីល Hwasong-17 និងមីស៊ីល្បឿនលឿនជាងសំឡេងដែលទើបធ្វើតេស្តកាលពីពេលថ្មីៗនេះ។

ទីភ្នាក់ងារសារព័ត៌មាន KCNA បានផ្សាយថា ក្បួនដង្ហែគឺបង្ហាញពីភាពទំនើប វីរភាព និងការអភិវឌ្ឍយ៉ាងឆាប់រហ័សនៃកម្លាំងប្រដាប់អាវុធរបស់កូរ៉េខាងជើង ព្រមទាំងជាឧត្តមភាពយោធា និងជាបច្ចេកវិទ្យាដែលមិនអាចផ្គូផ្គងបាន។

កូរ៉េខាងជើងបាននិយាយថា ខ្លួនជំទាស់នឹងសង្គ្រាម និងថា ការអភិវឌ្ឍអាវុធគឺដើម្បីការពារខ្លួនប៉ុណ្ណោះ ប៉ុន្តែក្នុងពិធីបង្ហាញកាលពីថ្ងៃចន្ទ លោក គីម បានលើកឡើងថា បេសកកម្មនៃកម្លាំងនុយក្លេអ៊ែររបស់ខ្លួនគឺដើម្បីរារាំងសង្គ្រាមរាប់បញ្ចូលទាំងការការពារផលប្រយោជន៍ជាមូលដ្ឋានរបស់ជាតិ៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសកូរ៉េខាងជើង