ព័ត៌មានអន្ដរជាតិ

ការតវ៉ារាប់រយកន្លែងផ្ទុះហិង្សានៅបារាំងក្នុងពេល«ទិវាពលកម្មអន្តរជាតិ»

បានផុស

៣ years មុន

នៅ

ថ្ងៃចន្ទ ២ ឧសភា ២០២២

ដោយ

ប៉ូលិសបាបាញ់ឧស្ម័នបង្ហូរទឹកភ្នែកដើម្បីបំបែកហ្វូងមនុស្សតវ៉ានៅប្រទេសបារាំង កាលពីថ្ងៃអាទិត្យ ទី១ ខែឧសភា ដែលជា«ទិវាពលកម្មអន្តរជាតិ»ប្រឆាំងនឹងគោលនយោបាយរបស់លោកប្រធានាធិបតី Emmanuel Macron ដែលទើបជាប់ឆ្នោតជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មនុស្សរាប់ម៉ឺននាក់បានចូលរួមពិធីដង្ហែរក្បួន«ទិវាពលកម្មអន្តរជាតិ»ទូទាំងប្រទេសបារាំងដើម្បីអំពាវនាវឲ្យដំឡើងប្រាក់ខែ និងស្នើឲ្យលោកប្រធានាធិបតី Macron ទម្លាក់ផែនការរបស់លោកក្នុងការដំឡើងអាយុចូលនិវត្តន៍។

រដ្ឋមន្ត្រីក្រសួងមហាផ្ទៃ លោក Gerald Darmanin បាននិយាយនៅលើ Twitter ថា ការតវ៉ាភាគច្រើនបំផុតប្រកបដោយសន្តិវិធី ប៉ុន្តែក៏កើតមានហិង្សានៅទីក្រុងផងដែរដែលប៉ូលិសចាប់ខ្លួនមនុស្ស៥៤នាក់ ក្នុងនោះមានស្ត្រីម្នាក់ដែលបានវ៉ៃអ្នកពន្លត់អគ្គីភ័យដែលកំពុងព្យាយាមពន្លត់ភ្លើថ។ លោកបានបញ្ជាក់ថា ការប្រឈមមុខដាក់គ្នាបានធ្វើឲ្យប៉ូលិស៨នាក់របួស។

ការប៉ះទង្គិចគ្នារវាងអ្នកតវ៉ា និងប៉ូលិសបានកើតមានឡើងនៅពេលការដើរក្បួនបានចាប់ផ្តើមនៅជិតទីលាន La Republique ហើយនៅពេលក្បួនបានទៅដល់ទីលាន La Nation ភាគខាងកើតទីក្រុងបារីស។

ក្រុមអនាធិបតេយ្យ “Black Bloc” បានវាយប្រហារលើភោជនីយដ្ឋានរបស់ McDonald មួយកន្លែងនៅតំបន់ Place Leon Blum ហើយបន្ទាប់មកបានវាយប្រហារអគារ និងទីតាំងជាច្រើនដែលបានធ្វើឲ្យខូចខាតបង្អួច ទ្វារ និងសម្ភារផ្សេងៗជាដើម។ ដោយមើលឃើញហិង្សាបានកើតមានឡើង ប៉ូលិសក៏បានឆ្លើយតបវិញតាមរយៈការបាញ់ឧស្ម័នបង្ហូរទឹកភ្នែក។

រដ្ឋមន្ត្រីក្រសួងមហាផ្ទៃបានបញ្ជាក់ថា មានការជួបជុំដើម្បីធ្វើការតវ៉ា និងដង្ហែរក្បួនប្រហែលជា២៥០កន្លែងនៅទីក្រុងបារីស និងទីក្រុងផ្សេងៗទៀតដូចជា Lille, Nantes, Toulouse និង Marseille ជាដើម។ បាតុករប្រហែលជា១០ម៉ឺននាក់បានចេញតវ៉ាទូទាំងប្រទេស៕

ប្រែសម្រួល៖ វីរបុត្រ
ប្រភព៖ Reuters

Related Topics:ប្រទេសបារាំង