ការជម្លៀសនៅរោងចក្រដែក Azovstal ក៏មានមេទាហានស៊ីឈ្នួលរបស់ លោក Zelensky

យោងតាមបុគ្គលិកអ៊ុយក្រែនបាននិយាយកាលពីថ្ងៃអាទិត្យថា មេទាហានស៊ីឈ្នួលម្នាក់ដែលកំពុងនៅរោងចក្រដែក Azovstal អំឡុងពេលជម្លៀសគឺមានទំនាក់ទំនងជាមួយលោកប្រធានាធីបតី Volodymyr Zelensky ។

លោក Natalya Usmanova បុគ្គលិករោងចក្រដែក Azovstal ដែលបានជម្លៀសចេញបានប្រាប់អ្នកយកព័ត៌មានថា “នៅរោងចក្រមានឧត្តមសេនីយ៍ស៊ីឈ្នួលម្នាក់កំពុងអង្គុយនៅក្នុងលេនដ្ឋាន ។ គាត់ត្រូវបានតែងតាំងជាអ្នកប្រយុទ្ធនៅតំបន់ Azov ហើយគាត់មានទំនាក់ទំនងផ្ទាល់ខ្លួនជាមួយលោក Zelensky” ។

មនុស្ស ៤០ នាក់ រួមទាំងបុរស ១៨ នាក់ ស្ត្រី ១៤ នាក់ និងកុមារ ៨ នាក់ត្រូវបានជម្លៀសចេញពីទឹកដីនៃរោងចក្រ Azovstal ក្នុងទីក្រុង Mariupol និងតំបន់ជាប់គ្នា ដោយជិះឡានក្រុងចំនួន ៣ គ្រឿង ខណៈមនុស្ស​ ៤៦ ​នាក់​ផ្សេង​ទៀត​បាន​រត់គេច​ខ្លួន​ចេញពី​ទឹកដី​ដោយ​ខ្លួនឯង​កាលពី​ថ្ងៃ​មុន ។

អ្នកជម្លៀសទាំងអស់បានស្នាក់នៅក្នុងជំរុំមួយក្នុងភូមិ Bezimennoye ពោលជាកន្លែងដែលពួកគេត្រូវបានផ្តល់កន្លែងស្នាក់នៅពេលយប់ ផ្ដល់អាហារ និងជំនួយផ្នែកវេជ្ជសាស្រ្តជាដើម ហើយការជម្លៀសនោះត្រូវបានត្រួតពិនិត្យដោយតំណាងអង្គការសហប្រជាជាតិ និងគណៈកម្មាធិការអន្តរជាតិនៃកាកបាទក្រហមផងដែរ ។

គួររម្លឹកឡើងវិញថា នៅថ្ងៃទី ៧ ខែមីនា កងកម្លាំងនៃសាធារណរដ្ឋប្រជាមានិត Donetsk បានឡោមព័ទ្ធទីក្រុង Mariupol ហើយបានចាប់ផ្តើមយុទ្ធនាការរំដោះជនស៊ីវិល ខណៈរហូតមកដល់ពេលនេះអ្នកប្រយុទ្ធដែលនៅសល់នៃកងវរសេនាតូចជាតិនិយម Azov កំពុងលាក់ខ្លួននៅក្នុងផ្លូវរូងក្រោមដីនៃរោងចក្រ Azovstal ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ប្រើត្រីដូហ្វីនជួយការពារមូលដ្ឋានទ័ពជើងទឹកពីការវាយប្រហាររបស់ អ៊ុយក្រែន នៅសមុទ្រខ្មៅ