ពិធីកររុស្ស៊ី ព្រមានថា ក្រុងមូស្គូ បាញ់មីស៊ីលតែមួយគ្រាប់ អង់គ្លេសទាំងមូល នឹងលិចចូលសមុទ្រ

ពិធីករទូរទស្សន៍រុស្ស៊ីមួយរូប បានព្រមានចក្រភពអង់គ្លេសថា វិមានក្រឹមឡាំងមានអំណាចវាយប្រហារប្រទេសនេះ ដោយមីស៊ីលនុយក្លេអ៊ែរ ដែលអាចបំផ្លាញប្រទេសទាំងស្រុង។

ពិធីករគាំទ្រលោកពូទីន ឈ្មោះ Dmitry Kiselyov បានអះអាងថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានដាក់កងកម្លាំងនុយក្លេអ៊ែររបស់ខ្លួន ស្ថិតក្នុងការប្រុងជើងការខ្ពស់ ឲ្យត្រៀមប្រយុទ្ធ បន្ទាប់ពីនាយករដ្ឋមន្រ្តីអង់គ្លេសលោក Boris Johnson បោះពាក្យសម្តីអំពីការវាយប្រហារសងសឹកលើប្រទេសរុស្ស៊ី។

លោក Kiselyov និយាយថា “តើនឹងមានអ្វីកើតឡើងបន្ទាប់ពីពាក្យសម្តីរបស់លោក Boris Johnson អំពីការវាយប្រហារសងសឹក? ជាទូទៅនៅចក្រភពអង់គ្លេស ហាក់ដូចជាកំពុងរញ៉េរញ៉ៃ។ ហេតុអ្វីបានជាពួកគេគំរាមកំហែងប្រទេសដ៏ធំដូចរុស្ស៊ី ជាមួយនឹងអាវុធនុយក្លេអ៊ែរ ទាំងដែលពួកគេគ្រាន់តែជាកោះតូចមួយនោះ?”។

លោក Kiselyov បាននិយាយបន្តទៀតថា ចក្រភពអង់គ្លេសគឺតូចណាស់ ដោយមីស៊ីល Sarmat ត្រឹមតែមួយគ្រាប់ គឺគ្រប់គ្រាន់ក្នុងការពន្លិចប្រទេសនេះទាំងស្រុងចូលទៅក្នុងសមុទ្រ។ លោក​បន្ថែម​ថា “​​បាញ់តែ​មួយគ្រាប់ នឹងធ្វើឲ្យ​​ប្រទេស​អង់គ្លេសបាត់ចេញពីផែនទី”។

ក្នុងអំឡុងពេលនៃការផ្សាយរបស់គាត់ ពិធីរុស្ស៊ីរូបនេះ ក៏បានចែករំលែកក្រាហ្វិកបង្កើតដោយកុំព្យូទ័រ ដែលបង្ហាញពីមីស៊ីល និងគ្រាប់រ៉ុកកែត Poseidon របស់រុស្ស៊ី ត្រូវបានបាញ់ដាក់ចក្រភពអង់គ្លេសផងដែរ៕

ប្រែសម្រួល៖ Vann Vann

ប្រភព៖ SKY

ចុចអាន៖ អាមេរិក មិនឃើញសញ្ញាថា រុស្ស៊ី ទទួលជំនួយសព្វាវុធពីប្រទេសទី៣ នោះទេ