អាមេរិក ចេញមុខធានា បើស៊ុយអែត ដាក់ពាក្យចូល ណាតូ

រដ្ឋមន្ត្រីការបរទេសស៊ុយអែត លោកស្រី Ann Linde បាននិយាយនៅក្នុងទីក្រុងវ៉ាស៊ីនតោនកាលពីថ្ងៃពុធទី០៤ខែឧសភាថា ប្រទេសស៊ុយអែត បានទទួលការធានាពីសហរដ្ឋអាមេរិកថា ខ្លួននឹងទទួលបានការគាំទ្រ អំឡុងពេលដំណើរការដាក់ពាក្យចូលរួមជាមួយអង្គការណាតូ។

ប្រទេសស៊ុយអែត និងហ្វាំងឡង់ ដែលនៅជិតខាង គឺនៅខាងក្រៅអង្គការណាតូ ក្នុងអំឡុងសង្គ្រាមត្រជាក់ ប៉ុន្តែការកាត់បញ្ចូលឧបទ្វីបគ្រីមៀរបស់រុស្ស៊ីនៅឆ្នាំ២០១៤ និងការលុកលុយអ៊ុយក្រែន បានជំរុញឲ្យប្រទេសទាំង២គិតឡើងវិញ អំពីគោលនយោបាយសន្តិសុខរបស់ពួកគេ។

ប្រទេសទាំងពីរមានការព្រួយបារម្ភថា ពួកគេនឹងងាយរងគ្រោះក្នុងអំឡុងពេលដំណើរការដាក់ពាក្យសុំចូលជាសមាជិក ដែលអាចចំណាយពេលដល់ទៅមួយឆ្នាំ ទើបអនុម័តដោយសមាជិកទាំងអស់របស់ណាតូ។

លោកស្រី Linde បានប្រាប់ទូរទស្សន៍ស៊ុយអែតពីទីក្រុងវ៉ាស៊ីនតោន បន្ទាប់ពីជួបជាមួយរដ្ឋមន្ត្រីការបរទេសអាមេរិក លោក Antony Blinken ថា “ខ្ញុំនឹងមិនលម្អិតឡើយអំពីរឿងនេះ ប៉ុន្តែប្រាកដណាស់ថា ឥឡូវនេះយើងមានការធានាពីអាមេរិក”។

លោកស្រីបន្ថែមថា “ទោះជាយ៉ាងណាក៏ដោយ មិនមែនជាការធានាសន្តិសុខជាក់ស្តែងទេ អ្វីដែលអ្នកអាចធ្វើបានលុះត្រាតែអ្នកជាសមាជិកពេញសិទ្ធិរបស់ណាតូ”។

ស្របពេលជាមួយគ្នានោះដែរ លោកស្រី Linde បានបដិសេធនិយាយថាតើការធានាអ្វី ដែលលោកស្រីទទួលបានពីលោក Blinken។

កាលពីខែមុន រដ្ឋមន្ត្រីការពារជាតិស៊ុយអែតបាននិយាយថា ការដាក់ពាក្យសុំចូលជាសមាជិកណាតូ​ អាចបង្កឲ្យមានការឆ្លើយតបខ្លាំងក្លាពីប្រទេសរុស្ស៊ី រួមមានទាំងការវាយប្រហារតាមអ៊ីនធើណិត និងវិធានការចម្រុះ ក៏ដូចជាយុទ្ធនាការឃោសនាផងដែរ ដើម្បីបំផ្លាញសន្តិសុខរបស់ប្រទេសស៊ុយអែត។

ទីក្រុងមូស្គូបានព្រមានថា ខ្លួនអាចនឹងដាក់ពង្រាយអាវុធនុយក្លេអ៊ែរ និងមីស៊ីលលឿនជាងសំឡេង នៅក្នុងតំបន់អឺរ៉ុប Kaliningrad ប្រសិនបើស៊ុយអែត និងហ្វាំងឡង់ក្លាយជាសមាជិកណាតូ។

ទាំងស៊ុយអែត និងហ្វាំងឡង់ ត្រូវបានគេរំពឹងថា នឹងធ្វើការសម្រេចចិត្តថាតើត្រូវដាក់ពាក្យសុំចូលរួមជាមួយអង្គការណាតូឬក៏អត់ក្នុងខែនេះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ប្រមុខចារកម្មអ៊ុយក្រែន អះអាងថា សង្គ្រាមមិនចប់ទេ លុះត្រាលោក ពូទីន ស្លាប់