ផ្ទុះសណ្ឋាគារលំដាប់ផ្កាយ៥ នៅគុយបា ស្លាប់និងរបួសមនុស្សជិត ១០០នាក់ 

មនុស្សចំនួន២៦នាក់បានស្លាប់ និងជាង៦០នាក់ត្រូវបានបញ្ជូនទៅកាន់មន្ទីរពេទ្យ បន្ទាប់ពីមានការផ្ទុះដ៏ធំមួយ បានវាយប្រហារសណ្ឋាគារលំដាប់ផ្កាយប្រាំ របស់ប្រទេសគុយបា។

ហេតុការណ៍នេះត្រូវបានគេជឿថា បង្កឡើងដោយរថយន្តដឹកហ្គាសមួយគ្រឿង ដែលចតនៅខាងក្រៅសណ្ឋាគារ Saratoga ក្នុងទីក្រុង Old Havana បង្កឲ្យមានការផ្ទុះ បំផ្លាញសំណង់ច្រើនជាន់ខណៈ សណ្ឋាគារ​ប្រវត្តិសាស្ត្រមួយនេះ ​ត្រៀម​បើក​ឡើង​វិញ​ ​ក្នុង​រយៈពេល​បួន​ថ្ងៃទៀត ក្រោយ​ជំងឺ​រាតត្បាត។

ប្រតិបត្តិការស្វែងរក និងជួយសង្គ្រោះ កំពុងដំណើរការដើម្បីកំណត់ទីតាំងមនុស្សដែលជាប់នៅក្រោមបំណែកបាក់បែក។

ការិយាល័យប្រធានាធិបតី​គុយបា ​បាន​និយាយ​ថា អ្នក​ស្លាប់​រួម​មាន​ស្ត្រី​មាន​ផ្ទៃ​ពោះ និង​កូន​ម្នាក់ ហើយអ្នករបួសកំពុងសម្រាកព្យាបាលនៅមន្ទីរពេទ្យក្បែរនោះ។

ទោះបីជាយ៉ាងណាក៏ដោយ សាលារៀនមួយកន្លែង ស្ថិតនៅខាងក្រោយសណ្ឋាគារនោះ មិនមានផលប៉ះពាល់អ្វីឡើយ ដោយមន្ត្រីក្នុងតំបន់បញ្ជាក់ថា កុមារៗទាំងអស់ត្រូវបានជម្លៀសចេញដោយសុវត្ថិភាព។

ឧបទ្ទវហេតុនេះកើតឡើង ខណៈវិស័យទេសចរណ៍នៅក្នុងប្រទេសគុយបា កំពុងងើបឡើងវិញបន្ទាប់ពីរងទុក្ខរយៈពេលពីរឆ្នាំ ដែលបណ្តាលមកពីជំងឺរាតត្បាត កូវីដ១៩៕

ប្រែសម្រួល៖ Vann Vann

ប្រភព៖ BBC