រុស្ស៊ី ទម្លាក់គ្រាប់បែកលើសាលារៀនអ៊ុយក្រែន ស្លាប់មនុស្ស២នាក់ ខណៈ៦០នាក់ទៀត ក៏គ្មានសង្ឃឹមរស់

លោក Serhiy Gaidai អភិបាលតំបន់ Luhansk បាននិយាយនៅថ្ងៃអាទិត្យទី៨ខែឧសភានេះថា មនុស្សពីរនាក់បានស្លាប់ នៅក្នុងការទម្លាក់គ្រាប់បែករបស់រុស្សី លើសាលារៀនមួយ ក្នុងភូមិ Bilohorivka របស់ប្រទេសអ៊ុយក្រែន ហើយមនុស្ស ៦០ នាក់ទៀតដែលជាប់នៅក្រោមគំនរបាក់បែក ក៏ត្រូវបានគេបារម្ភថា បាត់បង់ជីវិតផងដែរ។

លោក Gaidai និយាយថា រុស្សីបានទម្លាក់គ្រាប់បែកមួយគ្រាប់ កាលពីរសៀលថ្ងៃសៅរ៍លើសាលារៀនមួយកន្លែង ដែលមានមនុស្សប្រហែល ៩០ នាក់កំពុងជ្រកកោន ដោយបណ្តាលឲ្យមានអគ្គិភ័យឆាបឆេះអគារ។ អំឡុងពេលនោះ មនុស្សចំនួន ៣០នាក់ត្រូវបានជួយសង្គ្រោះ។

លោកបានសរសេរនៅលើ Telegram ថា “ភ្លើងត្រូវបានពន្លត់បន្ទាប់ពីឆាបឆេះអស់រយៈពេលជិត៤ម៉ោង។ ក្រោយពេលកម្ទេចកម្ទីត្រូវបានសម្អាត សាកសពមនុស្ស២នាក់ត្រូវបានរកឃើញ។ មនុស្ស ៦០ នាក់ទៀតទំនងជាស្លាប់នៅក្រោមគំនរបាក់បែកនៃអគារ”។

ដោយឡែកយោងតាមព័ត៌មានបឋម, ការបាញ់ផ្លោងនៅក្នុងភូមិ Shypilovo បានបំផ្លាញផ្ទះមួយខ្នង ហើយមនុស្ស ១១ នាក់នៅតែស្ថិតក្រោមអគារដែលបាក់។

ទោះបីជាយ៉ាងណាក៏ដោយ រ៉យទ័រមិនអាចផ្ទៀងផ្ទាត់របាយការណ៍នេះ ភ្លាមៗបានទេ ហើយក៏មិនមានការឆ្លើយតបភ្លាមៗពីរុស្ស៊ីដែរ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ពូទីន បង្ហាញអាវុធនុយក្លេអ៊ែរ ដែលពិភពលោក ខ្លាចបំផុត