សហរដ្ឋ​អាមេរិក អនុម័តច្បាប់ កម្មវិធី​អាវុធសម័យ​សង្រ្គាម​លោក​លើក​ទី​២ ដើម្បីជួយ អ៊ុយក្រែន (មានវីដេអូ)

សហរដ្ឋ​អាមេរិក​ បាន​នាំយក​កម្មវិធី​សម័យ​សង្រ្គាម​លោក​លើក​ទី​ពីរ​ត្រឡប់​មក​វិញ ដើម្បី​ជំរុញ​ការផ្គត់ផ្គង់​សព្វាវុធដល់ប្រទេស ​អ៊ុយក្រែន។

អង្គុយក្នុងការិយាល័យ Oval កាលពីថ្ងៃចន្ទទី០៩ខែឧសភា លោកប្រធានាធិបតី Joe Biden បានចុះហត្ថលេខាលើសេចក្តីព្រាងច្បាប់ស្តីពីការខ្ចី-ជួលដើម្បីការពារប្រជាធិបតេយ្យអ៊ុយក្រែនឆ្នាំ ២០២២ ឲ្យទៅជាច្បាប់ពេញលេញ។

ច្បាប់នេះផ្តល់ឲ្យលោក Biden នូវសិទ្ធិអំណាចក្នុងការខ្ចី ឬជួលឧបករណ៍ការពារដល់អ៊ុយក្រែន និងប្រទេសអឺរ៉ុបខាងកើតផ្សេងទៀត ខណៈដែលការលុកលុយរបស់រុស្ស៊ីក្នុងតំបន់ នៅតែបន្ត។

លោក Biden បាននិយាយនៅពេលគាត់ចុះហត្ថលេខាលើច្បាប់នេះថា “វាសំខាន់ វាពិតជាសំខាន់” ។

កម្មវិធីខ្ចី-ជួលស្រដៀងគ្នានេះ ត្រូវបានអនុម័តក្នុងឆ្នាំ ១៩៤១ ដើម្បីផ្តល់ជំនួយដ៏សំខាន់ដល់ប្រទេសសម្ព័ន្ធមិត្តក្នុងការប្រយុទ្ធជាមួយពួកណាស៊ីអាល្លឺម៉ង់។

ប្រធានាធិបតី Franklin Roosevelt បាននិយាយនៅពេលនោះថា សហរដ្ឋអាមេរិកគួរតែធ្វើជា ឃ្លាំងអាវុធដ៏អស្ចារ្យនៃលទ្ធិប្រជាធិបតេយ្យដើម្បីកម្ចាត់ Adolf Hitler។

គួរបញ្ជាក់ថា ច្បាប់ផ្តល់ខ្ចី-ជួលការពារលទ្ធិប្រជាធិបតេយ្យអ៊ុយក្រែនឆ្នាំ ២០២២នេះ គឺជាកិច្ចការទ្វេបក្ស ដោយឆ្លងកាត់ព្រឹទ្ធសភាជាមួយការយល់ព្រមជាឯកច្ឆ័ន្ទ ក្នុងសំឡេងគាំទ្រ៤១៧៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ ABC

ចុចអាន៖ សភាអាមេរិក អនុម័តច្បាប់អាវុធ ដូចសម័យសង្គ្រាមលោកលើកទី២ សម្រាប់អ៊ុយក្រែន (មានវីដេអូ)