ប្រទេសក្បែរខាង កម្ពុជា រកទិសដៅទិញប្រេងតម្លៃថោកពី រុស្ស៊ី (មានវីដេអូ)

ការិយាល័យ​នាយក​រដ្ឋ​មន្ត្រីឡាវ​បាន​បញ្ជាឲ្យ​ក្រសួង​ពាក់​ព័ន្ធ​ស្វែង​រកការទិញ​ប្រេងឥន្ធនៈ​ក្នុងតម្លៃថោក​ពីប្រទេស​រុស្ស៊ីដើម្បី​ឆ្លើយតប​នឹង​សំណើ​របស់​ក្រសួង​ហិរញ្ញវត្ថុ ក៏ដូចជា​ក្រសួង​ឧស្សាហកម្ម និង​ពាណិជ្ជកម្ម ស្តីពីគោលនយោបាយ​ស្ថិរភាព​តម្លៃ​ប្រេង​ជាតិ ។

ក្រោយការពិភាក្សាពីទិសដៅនេះរួចហើយ លោកនាយករដ្ឋមន្ត្រី Phankham Viphavanh ក៏បានយល់ព្រមតាមសំណើពីក្រសួងពាក់ព័ន្ធទាំងនោះដើម្បីបង្រួមក្រុមហ៊ុននាំចូលប្រេងឥន្ធនៈមួយចំនួន និងក្រុមហ៊ុនប្រេងឥន្ធនៈរដ្ឋឡាវទៅជាអង្គភាពតែមួយសម្រាប់ការនាំចូល និងចែកចាយប្រេងឥន្ធនៈ ។

ក្រុមហ៊ុនថ្មីនេះនឹងព្យាយាមស្វែងរកប្រេងឥន្ធនៈដែលមានតម្លៃថោកពីប្រភពថ្មីៗ រួមទាំងប្រទេសរុស្ស៊ីផងដែរដើម្បីព្យាយាមកាត់បន្ថយការចំណាយលើការទិញដំបូង និងបន្ធូរបន្ថយបន្ទុកលើអ្នកលក់រាយជាដើម ។

ទន្ទឹមនោះលោកនាយករដ្ឋមន្ត្រីក៏បានណែនាំដល់ក្រសួងហិរញ្ញវត្ថុឲ្យសម្របសម្រួលជាមួយធនាគារនៃប្រទេសឡាវ និងវិស័យពាក់ព័ន្ធផ្សេងទៀត ដើម្បីពិនិត្យមើលការគ្រប់គ្រងកាន់តែប្រសើរឡើងលើការផ្លាស់ប្តូររូបិយប័ណ្ណសម្រាប់ការទូទាត់ជាមួយប្រាក់រូបិ៍លរុស្ស៊ី ។

ចំណែកក្រសួងហិរញ្ញវត្ថុ និងធនាគារកណ្តាលត្រូវបានប្រគល់ភារកិច្ចធានាឲ្យបាននូវទុនបម្រុងរូបិយប័ណ្ណបរទេសគ្រប់គ្រាន់សម្រាប់ការនាំចូលប្រេងឥន្ធនៈ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Laotian Times

ចុចអាន ៖ មកដឹង ថេរវេលាដែលលោក ពូទីន ថ្លែងសុន្ទរកថាក្នុង “ទិវាជ័យជម្នះ ៩ ឧសភា”