អ៊ីស្រាអែល បាញ់សម្លាប់អ្នកកាសែត Al Jazeera នៅតំបន់ West Bank

យោងតាមក្រសួងសុខាភិបាលប៉ាឡេស្ទីនបានឲ្យដឹងថា កងកម្លាំងអ៊ីស្រាអែលបានបាញ់សម្លាប់អ្នកកាសែត Al Jazeera លោកស្រី Shireen Abu Akleh នៅតំបន់ West Bank ។

យោងតាមក្រសួង និងអ្នកកាសែត Al Jazeera បានឲ្យដឹងថា លោកស្រីត្រូវបានបាញ់ប្រហារដោយគ្រាប់ពិតនៅថ្ងៃពុធនេះ ខណៈកំពុងផ្សាយការវាយឆ្មក់របស់អ៊ីស្រាអែលនៅក្នុងទីក្រុង Jenin ហើយក្រោយមកបានស្លាប់នៅមន្ទីរពេទ្យ ដោយសារតែស្ថានភាពធ្ងន់ធ្ងរពេក ។

ចំណែកលោកស្រី Nida Ibrahim ជាមិត្តរួមការងារមកពីសារព័ត៌មាន Al Jazeera ដូចគ្នាបាននិយាយថា ការស្លាប់របស់លោកស្រី Abu Akleh មិនទាន់សន្មត់បាននៅឡើយទេ ប៉ុន្តែវីដេអូនៃឧប្បត្តិហេតុបង្ហាញថា លោកស្រីត្រូវបានបាញ់ចំក្បាល ។

គួរបញ្ជាក់ថា លោកស្រី Abu Akleh គឺជាអ្នកកាសែតដែលមានការគោរពស្រឡាញ់យ៉ាងខ្លាំង ហើយបានធ្វើការជាមួយសារព័ត៌មាន Al Jazeera ចាប់តាំងពីការចាប់ផ្តើមនៃចលនា Intifada ទី ២ របស់ប៉ាឡេស្ទីនក្នុងឆ្នាំ ២០០០ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera