អង់គ្លេស ហ្វាំងឡង់ និងស៊ុយអែត ចុះកិច្ចព្រមព្រៀងសន្តិសុខជួយគ្នា បើប្រទេសណារងការវាយប្រហារ 

ចក្រភពអង់គ្លេស បានយល់ព្រមលើកតិកាសញ្ញាសន្តិសុខទៅវិញទៅមក ជាមួយប្រទេសស៊ុយអែត និងហ្វាំងឡង់ ដោយយល់ព្រមផ្តល់ជំនួយ ប្រសិនបើប្រទេសណាមួយរងការវាយប្រហារ។

នាយករដ្ឋមន្ត្រីអង់គ្លេសលោក Boris Johnson បានធ្វើទស្សនកិច្ចប្រទេសទាំងពីរដើម្បីចុះហត្ថលេខាលើកិច្ចព្រមព្រៀង ចំពេលមានការជជែកវែកញែកអំពីរឿងដែលស៊ុយអែត និងហ្វាំងឡង់ ចូលរួមជាមួយអង្គការណាតូ។

កតិកាសញ្ញានេះ ក៏បានបញ្ជាក់ផងដែរថា ហ្វាំងឡង់ និងស៊ុយអែតនឹងជួយចក្រភពអង់គ្លេសក្នុងវិបត្តិ។

លោក Johnson និងនាយករដ្ឋមន្ត្រីស៊ុយអែត លោកស្រី Magdalena Andersson បាននិយាយថា កិច្ចសហប្រតិបត្តិការគឺកាន់តែសំខាន់ ដោយសារការលុកលុយរបស់រុស្ស៊ីលើអ៊ុយក្រែន។

កិច្ចព្រមព្រៀងទីពីរ ត្រូវបានប្រកាសនៅក្នុងសន្និសីទសារព័ត៌មានរួមគ្នា រវាងលោក Johnson ជាមួយប្រធានាធិបតីហ្វាំងឡង់លោក Sauli Niinistö។

លោក Johnson និយាយថា “សេចក្តីប្រកាសដ៏ឧឡារិករវាងចក្រភពអង់គ្លេស និងហ្វាំងឡង់ គឺឆ្លុះបញ្ចាំងពី ពេលវេលាលំបាកខ្លាំង ដែលយើងកំពុងជួបប្រទះ”។

លោកបានសង្កត់ធ្ងន់ថា កិច្ចព្រមព្រៀងនេះមិនមែនជា គម្លាតរយៈពេលខ្លីស្របពេល ហ្វាំងឡង់ ពិចារណាថាតើត្រូវចូលរួមជាមួយសម្ព័ន្ធភាពការពារណាតូឬក៏អត់នោះទេ ប៉ុន្តែជាការធានាយូរអង្វែងរវាងប្រទេសទាំងពីរ។

នៅពេលសួរថាតើនឹងមានទាហានអង់គ្លេសនៅលើទឹកដីហ្វាំងឡង់ដែរឬទេ ប្រសិនបើជម្លោះផ្ទុះឡើងនោះ, លោក Johnson និយាយថា ជំនួយយោធានឹងត្រូវបានផ្តល់ជូន ប៉ុន្តែថា លក្ខណៈនៃជំនួយនោះ នឹងអាស្រ័យលើសំណើរបស់ភាគីម្ខាងទៀត។ 

កិច្ចព្រមព្រៀងនេះ ក៏នឹងក្លាយទៅជាមូលដ្ឋានគ្រឹះ នៃការពង្រឹងសន្តិសុខរបស់យើង និងទំនាក់ទំនងការពារជាតិរបស់យើងតាមមធ្យោបាយផ្សេងទៀតផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ នាយករដ្ឋមន្ត្រីប៉ូឡូញ ថា Putin មានគ្រោះថ្នាក់ជាង Adolf Hitler និង Joseph Stalin ទៅទៀត