លោក ពូទីន ត្រូវការទាហាន ៦០ម៉ឺននាក់ទៀត និងអាចបាញ់នុយក្លេអ៊ែរ ដើម្បីយកឈ្នះ អ៊ុយក្រែន

ប្រធានាធិបតីរុស្ស៊ី លោក វ្ល៉ាឌីមៀរ ពូទីន នឹងត្រូវបញ្ជូនទាហានចំនួន ៦០ម៉ឺននាក់បន្ថែមទៀត ទៅកាន់ប្រទេសអ៊ុយក្រែន ដើម្បីទទួលបានជ័យជម្នះ។ នេះបើតាមការអះអាងពីអតីតអគ្គមេបញ្ជាការរងនៃសម្ព័ន្ធមិត្តកំពូលនៅអឺរ៉ុបរបស់អង្គការ ណាតូ។

លោក James Everard ក៏បានព្រមានដែរថា លោក ពូទីន អាចងាកទៅរកអាវុធនុយក្លេអ៊ែរ ដើម្បីស្វែងរកជ័យជម្នះ ឲ្យបាន។

ខណៈពេលពិភាក្សាជាមួយ The Sun អំពីតម្រូវការរបស់លោកពូទីន ក្នុងការបង្កើនកម្លាំងរបស់គាត់, លោក James បានដកស្រង់សេចក្តីថ្លែងការណ៍លើ Telegram ពីក្រុម Wagner ដែលជាទាហានស៊ីឈ្នួលមានទំនាក់ទំនងជិតស្និទ្ធជាមួយរដ្ឋរុស្ស៊ី ដែលនិយាយថាទីក្រុងមូស្គូ ត្រូវការបញ្ជូនទាហានពី ៦០ម៉ឺន ទៅ ៨០ម៉ឺននាក់ទៀត សម្រាប់ជ័យជម្នះទាំងស្រុងលើអ៊ុយក្រែន។

បន្ទាប់ពីមានព័ត៌មានថា សហរដ្ឋអាមេរិកកំពុងគាំទ្រអ៊ុយក្រែនជាមួយនឹងកញ្ចប់ថវិកា និងជំនួយយោធាក្នុងទំហំទឹកប្រាក់ ៣៣ពាន់លានដុល្លារ, លោក James ក៏បានព្រមានដែរថា លោក ពូទីន អាចនឹងសម្លឹងទៅរកអាវុធនុយក្លេអ៊ែរ។

លោក James បានពន្យល់ថា ឃ្លាំងអាវុធនុយក្លេអ៊ែររបស់រុស្ស៊ី ខុសពីចក្រភពអង់គ្លេស ដោយលោក ពូទីន មានទាំងអាវុធធុនតូច និងធំ។ អាចមានឱកាសដែលថា លោកពូទីននឹងប្រើប្រាស់អាវុធនុយក្លេអ៊ែរធុនតូច។

អតីតមេបញ្ជាការអង្គការណាតូរូបនេះក៏បាននិយាយផងដែរថា ប្រសិនបើលោក ពូទីន មិនទទួលបានជ័យជម្នះនៅអ៊ុយក្រែនឆាប់ៗនេះទេនោះ គាត់ប្រឈមមុខនឹងការបណ្តេញចេញពីតំណែងដោយមេទ័ពរបស់គាត់ ហើយអាចធ្វើឲ្យគាត់ត្រៀមខ្លួនក្នុងការបង្កើនកិច្ចខិតខំប្រឹងប្រែងនាពេលបច្ចុប្បន្ន៕

ប្រែសម្រួល៖​ Vann Vann

ប្រភព៖ Daily Star

ចុចអាន៖ រដ្ឋមន្ត្រីការពារជាតិអាមេរិក-រុស្ស៊ី និយាយគ្នាជាលើកដំបូង ចាប់តាំងក្រុង មូស្គូ លុកលុយអ៊ុយក្រែន