កូរ៉េខាងជើង ប្រហែលមានអ្នកឆ្លងកូវីដ ជាង ១លានករណីឯណោះ

មេដឹកនាំកូរ៉េខាងជើងលោក គីម ជុងអ៊ុន បានស្តីបន្ទោសមន្ត្រីសុខាភិបាល និងបានបញ្ជាឲ្យកងទ័ពជួយចែកចាយថ្នាំ ខណៈដែលរលកនៃករណី កូវីដ១៩ បានសាយភាយពេញប្រទេស។

ប្រព័ន្ធ​ផ្សព្វផ្សាយ​រដ្ឋ​រាយការណ៍​ថា មនុស្ស​ជាង​មួយ​លាន​នាក់ ​ឥឡូវនេះ​បាន​ឈឺ ប៉ុន្តែទី​ក្រុង​ព្យុងយ៉ាងហៅ​ថា​ជា “គ្រុនក្តៅ”។

មនុស្សប្រហែល៥០នាក់បានស្លាប់ ប៉ុន្តែក្នុងចំណោមនោះ គេមិនដឹងទេថា តើមានមនុស្សប៉ុន្មាននាក់ដែលធ្វើតេស្តវិជ្ជមានជំងឺកូវីដ១៩។

សមត្ថភាព​ធ្វើតេស្តរកកូវីដរបស់ប្រទេសកូរ៉េខាងជើង ​គឺ​មាន​កម្រិត ដូច្នេះ​ហើយ មានករណី​តិចតួចប៉ុណ្ណោះដែល​ត្រូវបាន​បញ្ជាក់។

ប្រជាជនកូរ៉េខាងជើង ទំនងជាងាយរងគ្រោះដោយសារវីរុសនេះ ព្រោះតែកង្វះវ៉ាក់សាំង និងប្រព័ន្ធថែទាំសុខភាពមិនល្អ។

ប្រទេសនេះ បានប្រកាសករណី កូវីដជាលើកដំបូងរបស់ខ្លួនកាលពីសប្តាហ៍មុន ថ្វីបើអ្នកជំនាញជឿថា វីរុសនេះទំនងជាចរាចរណ៍យូរហើយក៏ដោយ។

សហគមន៍អន្តរជាតិ បានផ្តល់ជូនកូរ៉េខាងជើងនូវថ្នាំបង្ការ AstraZeneca និងវ៉ាក់សាំងដែលផលិតដោយចិនរាប់លានដូសកាលពីឆ្នាំមុន ប៉ុន្តែទីក្រុងព្យុងយ៉ាងអះអាងថា ខ្លួនបានគ្រប់គ្រង កូវីដ ដោយការបិទព្រំដែននៅដើមខែមករាឆ្នាំ ២០២០៕

ប្រែសម្រួល៖ Vann Vann

ប្រភព៖ BBC

ចុចអាន៖ គីម ជុងអ៊ុន បញ្ជាឲ្យយោធាធ្វើសកម្មភាពខ្លាំងក្លា ខណៈស្ថានភាពកូវីដ កាន់តែធ្ងន់ធ្ងរ