ប្រជាជន ឡាវ តម្រង់ជួរចាំទិញប្រេងសាំង ព្រោះខ្លាចដាច់ស្តុក (មានវីដេអូ)

ប្រជាជនឡាវបាននាំគ្នាតម្រង់ជួរយ៉ាងវែងដើម្បីរង់ចាំទិញប្រេងសាំងនៅតាមស្ថានីយ៍ប្រេងឥន្ធនៈដែលនៅបើកដំណើរការសម្រាប់ប្រជាពលរដ្ឋនៅក្នុងប្រទេសឡាវ ស្របពេលដែលវិបត្តិប្រេងឥន្ធនៈនៅក្នុងប្រទេសកាន់តែធ្ងន់ធ្ងរទៅៗ ។

តាមរយៈវីដេអូឃ្លីបមួយដែលត្រូវបានបង្ហោះនៅលើបណ្តាញសង្គមហ្វេសប៊ុក បង្ហាញពីសកម្មភាពប្រជាពលរដ្ឋឡាវជាច្រើននាក់បាននាំគ្នាឈរតម្រង់ជួរជាមួយនឹងធុង ឬបីដុង នៅស្ថានីយ៍ប្រេងឥន្ធនៈមួយកន្លែងក្នុងទីក្រុងវៀងច័ន្ទកាលពីថ្ងៃទី ១០ ខែឧសភា ឆ្នាំ ២០២២ ។

ទន្ទឹមនោះកាសែត Laotiane Times បានរាយការណ៍ថា តាមបណ្តាស្ថានីយ៍ប្រេងឥន្ធនៈជាច្រើនបានបិទកាលពីសប្តាហ៍មុន ស្របពេលមានរបាយការណ៍ថា ការផ្គត់ផ្គង់ប្រេងឥន្ធនៈរបស់ប្រទេសជិតអស់ពីស្តុក ខណៈរដ្ឋាភិបាល និងបណ្តាភ្នាក់ងារពាក់ព័ន្ធក៏បានកោះប្រជុំបន្ទាន់មួយដើម្បីស្វែងរកដំណោះស្រាយចំពោះវិបត្តិប្រេងឥន្ធនៈនេះផងដដែរ ។

ដោយឡែកយោងតាមកាសែត Vientiane Times វិញបានឲ្យដឹងដែរថា ដោយសារតែអតិផរណាប្រាក់កីបកើនឡើងខ្ពស់ និងទីផ្សារប្រេងពិភពលោកប្រែប្រួល ធ្វើឲ្យក្រុមហ៊ុននាំចូលប្រេងឥន្ទនៈរបស់ប្រទេសនេះមិនអាចបំពេញតម្រូវការរបស់សាធារណៈបានឡើយ ។

ប្រភពដដែលបន្តថា ដើម្បីបំពេញតម្រូវការប្រើប្រាស់របស់ប្រជាពលរដ្ឋ ប្រទេសឡាវត្រូវការប្រេងឥន្ទនៈប្រមាណ ១២០ លានលីត្រក្នុងមួយខែ ប៉ុន្តែក្រុមហ៊ុននាំចូលអាចនាំចូលប្រេងបានត្រឹមតែ ២០ លានលីត្រប៉ុណ្ណោះ ៕

សូមទស្សនាវីដេអូ!

ប្រែសម្រួលដោយ ៖ គង់ សំអាន

ប្រភព ៖ VOA Lao

ចុចអាន ៖ ប្រទេសក្បែរខាង កម្ពុជា រកទិសដៅទិញប្រេងតម្លៃថោកពី រុស្ស៊ី (មានវីដេអូ)