ព័ត៌មានអន្ដរជាតិ

បារាំងថា អ៊ុយក្រែនត្រូវការពេល១៥ទៅ២០ឆ្នាំដើម្បីចូលជាសមាជិក EU

បានផុស

៣ years មុន

នៅ

ថ្ងៃចន្ទ ២៣ ឧសភា ២០២២

ដោយ

រដ្ឋមន្ត្រីកិច្ចការអឺរ៉ុបរបស់ប្រទេសបារាំង លោក Clement Beaune បានកាលពីថ្ងៃអាទិត្យម្សិលមិញបានលើកឡើងថា គ្មានការចូលជាសមាជិករបស់ប្រទេសអ៊ុយក្រែនទៅសហភាពអឺរ៉ុប (EU) លឿនពេកទេ ហើយដំណើរការត្រូវកាពេលច្រើនឆ្នាំណាស់។

លោក Beaune បានប្រាប់វិទ្យុ Radio J ថា ៖«យើងត្រូវតែស្មោះត្រង់។ ប្រសិនបើនិយាយថា អ៊ុយក្រែននឹងចូលជាសមាជិកសហភាពអឺរ៉ុបក្នុងរយៈពេល៦ខែ មួយឆ្នាំ ឬពីរឆ្នាំ នោះយើងកំពុងកុហកហើយ។ វាមិនពិតទេ។ វាប្រហែលជាត្រូវការ១៥ទៅ២០ឆ្នាំ។ វាត្រូវការពេលយូរណាស់»។

«ខ្ញុំមិនចង់ឲ្យអ៊ុយក្រែននូវការភាន់ច្រឡំ ឬកុហកនោះទេ»។ លោកបានបន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Beaune ដែលត្រូវបានកាសែត Politico ពិពណ៌នាជាអ្នកការពារគួរឲ្យទុកចិត្តរបស់លោកប្រធានាធិបតីបារាំង Emmanual Macron ត្រូវបានតែងតាំងជារដ្ឋមន្ត្រីកិច្ចការអឺរ៉ុបកាលពីថ្ងៃសុក្រ នៅក្នុងរដ្ឋាភិបាលដែលដឹកនាំដោយលោកនាយករដ្ឋមន្ត្រី Elisabeth Borne។

លោកបានលើកឡើងថា អ៊ុយក្រែនគួរក្លាយជាផ្នែកមួយនៃជីវិតនយោបាយរបស់សហភាពអឺរ៉ុប ដោយលើកឡើងនូវគំនិតនៃការបង្កើតសមាជិកភាពជំនួសសម្រាប់ប្រទេសនេះ។

«នៅក្នុងពេលនេះ យើងជំពាក់ជនជាតិអ៊ុយក្រែន ជាគម្រោងនយោបាយដែលពួកគេអាចចូលបាន»។ លោក Beaune បាននិយាយ។

កាលពីដើមខែនេះ លោក Macron បានទទួលស្គាល់ថា ដំណើរការចូលជាសមាជិកសហភាពអឺរ៉ុបរបស់អ៊ុយក្រែនអាចត្រូវការពេលច្រើនទសវត្សរ៍។ «បើទោះជាយើងផ្តល់ឲ្យពួកគេជានូវគោលជំហរជាបេក្ខភាពថ្ងៃស្អែក យើងទាំងអស់គ្នាដឹងច្បាស់ណាស់ថា ដំណើរការនៃការអនុញ្ញាតឲ្យពួកគេចូលអាចត្រូវការច្រើនឆ្នាំ។ ពិតទៅអាចជាច្រើនទសវត្សរ៍ផង»៕

ប្រែសម្រួល៖ វីរបុត្រ
ប្រភព៖ RT

Related Topics:សហភាពអឺរ៉ុប EU