លោក Biden ប្តេជ្ញា​ឆ្លើយតបផ្នែក​យោធា បើ​ចិន​លុកលុយ ​តៃវ៉ាន់

ប្រធានាធិបតីអាមេរិកលោក Joe Biden បាននិយាយនៅថ្ងៃចន្ទទី២៣ខែឧសភានេះថា លោកប្តេជ្ញាប្រើប្រាស់កម្លាំងដើម្បីការពារកោះតៃវ៉ាន់ ហើយថា សហរដ្ឋអាមេរិកឈរជាមួយប្រទេសផ្សេងទៀតដើម្បីធ្វើឲ្យប្រាកដថា ប្រទេសចិនមិនអាចប្រើប្រាស់កម្លាំងនៅកោះតៃវ៉ាន់បានឡើយ។

លោក​បាន​បន្ថែម​ថា ចិន​កំពុងបង្ក​គ្រោះ​ថ្នាក់​នៅ​តៃវ៉ាន់ ​ដោយបញ្ជូនយន្តហោះ​កៀក​នឹង​កោះ។

ស្របពេលជាមួយគ្នានោះដែរ ប្រធានាធិបតីសហរដ្ឋអាមេរិក លោក Joe Biden និយាយថា សហរដ្ឋអាមេរិកនៅតែប្តេជ្ញាចិត្តយ៉ាងពេញលេញចំពោះការការពាររបស់ប្រទេសជប៉ុន។

លោក Biden បានធ្វើការកត់សម្គាល់បែបនេះ នៅពេលចាប់ផ្តើមនៃកិច្ចប្រជុំរបស់គាត់ជាមួយនាយករដ្ឋមន្រ្តីជប៉ុន Kishida Fumio ក្នុងទីក្រុងតូក្យូ នៅថ្ងៃចន្ទ។

លោកប្រធានាធិបតីបាននិយាយថា សម្ព័ន្ធភាពអាមេរិក-ជប៉ុន គឺជាមូលដ្ឋានគ្រឹះនៃសន្តិភាព និងវិបុលភាពនៅក្នុងឥណ្ឌូប៉ាស៊ីហ្វិកជាយូរមកហើយ។

លោកនិយាយថា ក្របខណ្ឌសេដ្ឋកិច្ចឥណ្ឌូ-ប៉ាស៊ីហ្វិក ឬ IPEF នឹងត្រូវបានដាក់ឲ្យដំណើរការនៅពេលក្រោយ ដើម្បីបង្កើនកិច្ចសហប្រតិបត្តិការជាមួយប្រទេសផ្សេងទៀតនៅក្នុងតំបន់ និងផ្តល់អត្ថប្រយោជន៍ជាក់ស្តែងសម្រាប់ប្រជាជនក្នុងតំបន់។

លោក Biden ក៏បានលើកឡើងផងដែរថា ប្រទេសជប៉ុនកំពុងធ្វើការជាមួយដៃគូ G7 ផ្សេងទៀត ដើម្បីឲ្យប្រធានាធិបតីរុស្ស៊ី លោក Vladimir Putin ទទួលខុសត្រូវចំពោះសង្គ្រាមនៅអ៊ុយក្រែន និងក្រោកឈរឡើងសម្រាប់តម្លៃលទ្ធិប្រជាធិបតេយ្យរួមគ្នា៕

ប្រែសម្រួល៖ Vann Vann

ប្រភព៖ NHK, Alarabiya

ចុចអាន៖ ចិន ព្រមាននាវាចម្បាំងអាមេរិក ដែលឆ្លងកាត់ច្រកសមុទ្រតៃវ៉ាន់ ក្រោយក្រុងប៉េកាំង ធ្វើសមយុទ្ធ