ព័ត៌មានអន្ដរជាតិ

ថ្ងៃនេះ UN នឹងបោះឆ្នោតជំរុញអាមេរិកដាក់ទណ្ឌកម្មលើកូរ៉េខាងជើងបន្ថែមទៀត

បានផុស

៣ years មុន

នៅ

ថ្ងៃព្រហស្បតិ៍ ២៦ ឧសភា ២០២២

ដោយ

នៅថ្ងៃព្រហស្បតិ៍ ទី២៦ ខែឧសភានេះ ក្រុមប្រឹក្សាសន្តិសុខអង្គការសហប្រជាជាតិនឹងបោះឆ្នោតលើការជំរុញរបស់សហរដ្ឋអាមេរិកមួយដើម្បីពង្រឹងទណ្ឌកម្មលើប្រទេសកូរ៉េខាងជើងជុំវិញការបាញ់សាកល្បងមីស៊ីលបាលីស្ទិកថ្មីៗរបស់ខ្លួនដែលចំណាត់ការនេះប្រទេសចិនជាប្រទេសមហាអំណាចវេតូបាននិយាយថា នឹងមិនអាចដោះស្រាយបញ្ហាបានឡើយ។

ការបោះឆ្នោតកើតឡើងមួយថ្ងៃ បន្ទាប់ពីរដ្ឋាភិបាលទីក្រុងព្យុងយ៉ាងបានបាញ់សាកល្បងមីស៊ីល៣គ្រាប់ ក្នុងនោះ១គ្រាប់ជាមីស៊ីលបាលីស្ទីកអន្តរទ្វីបធំបំផុត បន្ទាប់ពីដំណើរទស្សនកិច្ចរបស់ប្រធានាធិបតីអាមេរិក លោក ចូ បៃដិន មកកាន់តំបន់អាស៊ី។ វាក៏ជាការបាញ់មីស៊ីលបាលីស្ទីកអន្តរទ្វីបថ្មីបំផុតនៅក្នុងឆ្នាំនេះដែលជាអាវុធត្រូវបានក្រុមប្រឹក្សាសន្តិសុខអង្គការសហប្រជាជាតិហាមឃាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីអាមេរិកបាននិយាយថា ៖«សេចក្តីព្រាងដំណោះស្រាយនឹងរឹតបន្តឹងសមត្ថភាពរបស់កូរ៉េខាងជើងក្នុងការជំរុញកម្មវិធីអាវុធប្រល័យលោក (WMD) និងមីស៊ីលបាលីស្ទីកខុសច្បាប់ ដែលវានឹងសម្រួលដល់ការអនុវត្តការដាក់ទណ្ឌកម្ម និងជួយសម្រួលបន្ថែមទៀតដល់ការផ្តល់ជំនួយមនុស្សធម៌ដល់អ្នកដែលត្រូវការ»។

កូរ៉េខាងជើងបានក្លាយជាមុខសញ្ញាក្នុងការដាក់ទណ្ឌកម្មរបស់អង្គការសហប្រជាជាតិចាប់តាំងពីឆ្នាំ២០០៦ ដែលក្រុមប្រឹក្សាសន្តិសុខបានបង្កើតយ៉ាងរឹងមាំ និងឯកច្ឆន្ទរយៈពេលជាច្រើនឆ្នាំមកហើយដើម្បីកាត់មូលនិធិសម្រាប់កម្មវិធីអាវុយក្លេអ៊ែរ និងមីស៊ីលបាលីស្ទីករបស់រដ្ឋាភិបាលទីក្រុងព្យុងយ៉ាង។

ប៉ុន្តែប្រទេសចិន និងរុស្ស៊ី បានកំពុងបន្ធូរបន្ថយទណ្ឌកម្មលើមូលដ្ឋានមនុស្សធម៌។ ដំណោះស្រាយត្រូវការសំឡេងគាំទ្រចំនួន៩ទើបជោគជ័យ បើទោះជារុស្ស៊ី ចិន បារាំង អង់គ្លេស ឬអាមេរិកមិនបោះឆ្នោតគាំទ្រក៏ដោយ។

«យើងខ្ញុំមិនគិតថា ដំណោះស្រាយដែលបានស្នើដោយអាមេរិកអាចដោះស្រាយបញ្ហាបាននោះទេ»។ អ្នកនាំពាក្យសម្រាប់ក្រុមបេសកកម្មរបស់ចិនប្រចាំនៅ UN បានប្រាប់សារព័ត៌មាន Reuters និងបានបន្ថែមថា ផ្ទុយទៅវិញ ចិន បានស្នើឲ្យក្រុមប្រឹក្សាអនុម័តសេចក្តីថ្លែងការណ៍ផ្លូវការជំនួសឲ្យដំណោះស្រាយទណ្ឌកម្មវិញ។

អ្នកនាំពាក្យបាននិយាយថា ៖«សហរដ្ឋអាមេរិកដឹងពីវិធីដ៏ល្អបំផុតសម្រាប់កាត់បន្ថយការកើនឡើង ប៉ុន្តែគ្រាន់តែទប់ទល់ធម្មតាៗ»។ ចិនបាននិយាយថា ទីក្រុងវ៉ាស៊ីនតោនគួរបង្ហាញភាពស្មោះត្រង់និងភាពបត់បែនកាន់តែច្រើន ប្រសិនបើខ្លួនចង់ឲ្យមានការទម្លាយផ្លូវជាមួយកូរ៉េខាងជើង៕

ប្រែសម្រួល៖ វីរបុត្រ
ប្រភព៖ Reuters