ទីប្រឹក្សាលោក Biden លួចទៅ អារ៉ាប៊ីសាអូឌីត យ៉ាងសម្ងាត់ ដើម្បីបញ្ចុះ បញ្ចូលរកប្រេងបន្ថែម

មន្ត្រីអាមេរិកកំពុងបំពេញបេសកកម្មយ៉ាងសម្ងាត់ទៅកាន់ប្រទេសអារ៉ាប៊ីសាអូឌីតក្នុងគោលបំណងជំរុញឲ្យរដ្ឋឈូងសមុទ្រមួយនេះបង្កើនការផលិតប្រេង និងធ្វើឲ្យទំនាក់ទំនងមានលក្ខណៈធម្មតាជាមួយអ៊ីស្រាអែល ។

ដោយដកស្រង់សម្ដីពីអតីតមន្ត្រីអាមេរិកចំនួន ៣ រូប, សារព័ត៌មាន Axios បាននិយាយថា អ្នកសម្របសម្រួលសេតវិមាន និងមជ្ឈិមបូព៌ាលោក Brett McGurk និងបេសកជនផ្នែកថាមពលនៃក្រសួងការបរទេសលោក Amos Hochstein បានទៅដល់ប្រទេសអារ៉ាប៊ីសាអូឌីតកាលពីថ្ងៃអង្គារ ។

ព័ត៌មានដែលទីប្រឹក្សាទាំងពីររូបរបស់ប្រធានាធិបតីអាមេរិកលោក Joe Biden បានទៅដល់ទីក្រុង Riyadh បានកើតឡើងនៅថ្ងៃតែមួយដែលរដ្ឋមន្ត្រីថាមពលលោក Jennifer Granholm បាននិយាយថា លោក Biden បានទទួលស្គាល់ពីតម្លៃឧស្ម័នពិតជាឡើងខ្ពស់ ។

រហូតមកដល់ពេលនេះ អារ៉ាប៊ីសាអូឌីតបានព្រងើយកន្តើយនឹងការអំពាវនាវម្តងហើយម្តងទៀតរបស់បស្ចិមប្រទេសឲ្យបង្កើនផលិតកម្មប្រេងដើម្បីកាត់បន្ថយផលប៉ះពាល់នៃទណ្ឌកម្មប្រឆាំងរុស្ស៊ីលើទីផ្សារថាមពលលោកខាងលិច ។

ផ្ទុយទៅវិញនៅក្នុងបទសម្ភាសន៍មួយដែលបានចេញផ្សាយកាលពីថ្ងៃអង្គារ រដ្ឋមន្ត្រីថាមពលព្រះអង្គម្ចាស់ Abdulaziz bin Salman បានប្រាប់កាសែត Financial Times ថា អារ៉ាប៊ីសាអូឌីតនឹងធ្វើកិច្ចព្រមព្រៀងជាមួយអង្គការ OPEC+ រួមទាំងប្រទេសរុស្ស៊ីផងដែរ ខណៈនយោបាយទាំងឡាយគួរតែត្រូវបានរក្សាដាច់ដោយឡែកពីអង្គការ OPEC+ ហើយពិភពលោកគួរតែដឹងគុណតម្លៃនៃសម្ព័ន្ធភាពថាមពល ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ឧត្តមសេនីយចូលនិវត្តន៍របស់ រុស្ស៊ី រិះគន់លោក ពូទីន ចំពោះសង្គ្រាម អ៊ុយក្រែន