ទារក ១១នាក់ ស្លាប់ក្នុងអគ្គិភ័យឆាបឆេះមន្ទីរពេទ្យទើបសម្ពោធនៅ សេណេហ្គាល់

ទារកទើបនឹងកើតចំនួន ១១នាក់បានស្លាប់កាលពីយប់ថ្ងៃពុធទី២៥ខែឧសភា នៅពេលអគ្គិភ័យឆាបឆេះរាលដាលដល់បន្ទប់ដាក់ទារក នៃមន្ទីរពេទ្យទើបសម្ពោធដាក់ឲ្យប្រើប្រាស់នាពេលថ្មីៗនេះ ក្នុងទីក្រុង Tivaouane ចម្ងាយជាង ១២០គីឡូម៉ែត្រ ភាគខាងកើតរដ្ឋធានី ដាកា របស់ប្រទេស សេណេហ្គាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានាធិបតី Macky Sall បាននិយាយនៅក្នុង Twitter ថា “ខ្ញុំតក់ស្លុត ដែលទទួលដំណឹងអំពីការស្លាប់ទារកចំនួន ១១ នាក់នៅក្នុងគ្រោះអគ្គិភ័យ ដែលបានកើតឡើងនៅក្នុងផ្នែកថែទាំទារកទើបនឹងកើត នៃមន្ទីរពេទ្យ Mme Abdou Aziz Sy Dabakh ក្នុងទីក្រុង Tivaouane”។

ទោះបីជាយ៉ាងណាក៏ដោយ ភ្នាក់ងារ​ពន្លត់​អគ្គិភ័យ និង​មន្ត្រីក្នុង​តំបន់ ​មិន​អាច​ទាក់ទង​ ​សុំ​ការ​អត្ថាធិប្បាយ​ភ្លាមៗបាន​ទេ។

អ្នកនយោបាយសេណេហ្គាល់ឈ្មោះ Diop Sy បានអះអាងថា “អគ្គិភ័យនេះគឺបណ្តាលមកពី ការទុស្សេខ្សែភ្លើង ហើយភ្លើង​បាន​រាល​ដាល​យ៉ាង​ឆាប់​រហ័ស។ ទារកបីនាក់ត្រូវបានសង្គ្រោះ”។

គួរបញ្ជាក់ថា សោកនាដកម្មនៅ Tivaouane កើតឡើងបន្ទាប់ពីឧប្បត្តិហេតុជាច្រើនផ្សេងទៀតនៅឯគ្រឹះស្ថានសុខាភិបាលសាធារណៈ ក្នុងប្រទេសសេណេហ្គាល់។

នៅទីក្រុង Linguere ភាគខាងជើង កាលពីចុងខែមេសា អគ្គិភ័យបានឆាបឆេះនៅមន្ទីរពេទ្យមួយ ហើយទារកទើបនឹងកើតចំនួន ៤នាក់បានស្លាប់។ អភិបាល​ក្រុង​នោះ​បាន​លើក​ឡើង​ពី​បញ្ហា​អគ្គិសនី​ពាក់ព័ន្ធ​ម៉ាស៊ីន​ត្រជាក់ ​ក្នុង​បន្ទប់​សម្ភព។

ឧបទ្ទវហេតុកាលពីថ្ងៃពុធ ក៏កើតឡើងជាងមួយខែផងដែរ បន្ទាប់ពីប្រជាជាតិនេះ កាន់ទុក្ខចំពោះការស្លាប់របស់ស្ត្រីមានផ្ទៃពោះម្នាក់ ដែលរង់ចាំការវះកាត់តែគ្មានគ្រូពេទ្យណាអើពើ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ផ្ទុះឃ្លាំងស្តុកសារធាតុគីមីដ៏ខ្លាំងក្លានៅឥណ្ឌា សម្លាប់មនុស្ស ១២ នាក់