WHO៖ ជំងឺ​អុត​ស្វា​បង្ហាញ​​ហានិភ័យ​ជា​​​មធ្យម​​​ដល់​​​សុខ​ភាព​​សាធារណៈ

កាលពីថ្ងៃអាទិត្យម្សិលមិញ អង្គការសុខភាពពិភពលោក (WHO) បានលើកឡើងថា ជំងឺអុតស្វាបង្ហាញពីហានិភ័យជាមធ្យមចំពោះសុខភាពសាធារណៈក្នុងកម្រិតទូទាំងពិភពលោក។

WHO បានរៀបរាប់ថា ៖«ហានិភ័យរបស់ជំងឺអុតស្វាចំពោះសុខភាពសាធារណៈអាចកើតមានកម្រិតខ្ពស់ ប្រសិនបើវីរុសនេះអាចទាញយកឱកាសដើម្បីបំប្លែងខ្លួនជាភ្នាក់ងារបង្ករោគនៅក្នុងមនុស្ស និងរាលដាលដល់ក្រុមមនុស្សងាយរងគ្រោះធ្ងន់ធ្ងរដូចជា កុមារតូចៗ និងមនុស្សដែលមានភាពស៊ាំខ្សោយជាដើម»។

ទីភ្នាក់ងារសុខភាពពិភពលោកបាននិយាយក្នុងសេចក្តីថ្លែងការណ៍មួយថា គិតត្រឹមថ្ងៃទី២៦ ខែឧសភាកន្លងទៅ មានចំនួន២៥៧ករណីត្រូវបានបញ្ជាក់ និង១២០ករណីត្រូវបានសង្ស័យគឺត្រូវបានរាយការណ៍ពីប្រទេស២៣ទូទាំងពិភពលោកដែលបានបញ្ជាក់ថា មិនមែនជាប្រភេទវីរុសរាតត្បាតទេ។ រហូតដល់ពេល​នេះ គ្មានសេចក្តីរាយការណ៍ណាមួយពីការស្លាប់ដែរ។

WHO ក៏បាននិយាយដែរថា ការលេចឡើងនៃជំងឺអុតស្វាភ្លាមៗក្នុងពេលតែមួយនៅក្នុងប្រទេសដែលមិនរាតត្បាតបង្ហាញថា ការឆ្លងមិនអាចរកឃើញ និងមិនមានការរីករាលដាលថ្មី។ ទីភ្នាក់ងារសុខភាពសង្ឃឹមថា ករណីជាច្រើនទៀតត្រូវបានរាយការណ៍ ខណៈការតាមដានក្នុងប្រទេសកើតមាន ប៉ុន្តែមិនរាលដាល។

ជំងឺអុតស្វា គឺជាជំងឺឆ្លងដែលជាធម្មតាមានកម្រិតស្រាល ហើយជាជំងឺកើតមាននៅតំបន់អាហ្វ្រិកភាគខាងលិច និងអាហ្វ្រិកភាគកណ្តាល។ វាត្រូវបានឆ្លងដោយការទំនាក់ទំនងជិតស្និទ្ធ ដូច្នេះវាអាចត្រូវបានគ្រប់គ្រងបាន​​ស្រួលតាមរយៈវិធានការដូចជា ការដាក់ឱ្យនៅដាច់ដោយឡែក និងអនាម័យ។

ករណីភាគច្រើនត្រូវបានរាយការណ៍រហូតដល់ពេលនេះរកឃើញនៅចក្រភពអង់គ្លេស អេស្ប៉ាញ និងព័រទុយហ្គាល់។

«ភាគច្រើននៃករណីដែលបានរាយការណ៍រហូតដល់ពេលនេះមិនពាក់ព័ន្ធនឹងការធ្វើដំណើរទៅកាន់តំបន់ដែលកើតមាននោះទេ និងបានរកឃើញតាមរយៈសេវាថែទាំសុខភាពបឋម ឬសេវាសុខភាពផ្លូវភេទ»។ ទីភ្នាក់ងារសុខភាពរបស់ U.N. បាននិយាយ៕

ប្រែសម្រួល៖ វីរបុត្រ
ប្រភព៖ Reuters