រុស្ស៊ី ថា លោកខាងលិចមិនបានការពារ អ៊ុយក្រែន ទេ ពួកគេចាត់ទុកទីក្រុង កៀវ ជា “បន្ទះឈីបចរចា” ប៉ុណ្ណោះ

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយថា ទណ្ឌកម្មចុងក្រោយបំផុតរបស់លោកខាងលិចប្រឆាំងនឹងរុស្ស៊ីត្រូវបានរៀបចំតាំងពីយូរយារណាស់មកហើយ ហើយវាច្បាស់ណាស់អាទិភាពចម្បងរបស់បស្ចិមលោកគឺមិនមែនការពារអ៊ុយក្រែននោះទេ ពួកគេចាត់ទុកអ៊ុយក្រែនគ្រាន់តែជា “បន្ទះឈីបចរចា” ប៉ុណ្ណោះ” ។

លោក Lavrov បាននិយាយនៅក្នុងបទសម្ភាសន៍ជាមួយទូរទស្សន៍បារាំង TF1 ថា “ល្បឿនដែលពួកគេរៀបចំចងក្រង និងបរិមាណទណ្ឌកម្មរបស់ពួកគេបង្ហាញថា ពួកគេមិនមែនបង្កើតវាឡើងតែមួយយប់នោះទេ ពួកគេបានរៀបចំមួយរយៈពេល ឬយូរយារណាស់មកហើយ ។

លោក Lavrov បានបន្ថែមថា “សហរដ្ឋអាមេរិកបានទាក់ទងជាមួយសម្ព័ន្ធមិត្តរបស់ខ្លួន ហើយបាននិយាយថា ទោះវិបត្តិនៅអ៊ុយក្រែនចប់ក៏ដោយ តែការដាក់ទណ្ឌកម្មលើរុស្ស៊ីនឹងនៅតែមានដដែល ហើយទំនងជាមិនត្រូវបានលុបចោលនោះទេ” ។

លោក Lavrov បានឲ្យដឹងទៀតថា លោកខាងលិចក៏ព្រងើយកន្តើយចំពោះការពិតដែលថា អ៊ុយក្រែនបដិសេធជាសាធារណៈក្នុងការគោរពតាមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិដែលជំរុញឲ្យការអនុវត្តកិច្ចព្រមព្រៀងទីក្រុង Minsk ដែលចុះហត្ថលេខាដោយបារាំង និងអាល្លឺម៉ង់ ។

គួរបញ្ជាក់ថា ប្រទេសរុស្ស៊ីបានចាប់ផ្តើមប្រតិបត្តិការយោធាកាលពីខែកុម្ភៈជាមួយនឹងគោលដៅបញ្ចប់ឧក្រិដ្ឋកម្មសង្គ្រាមដែលបានប្រព្រឹត្តដោយកងទ័ពអ៊ុយក្រែនប្រឆាំងនឹងជនស៊ីវិល ក្នុងអំឡុងពេលការវាយលុករយៈពេល ៨ ឆ្នាំនៅតំបន់ Donbass ខណៈលោកប្រធានាធិបតី វ្ល៉ាឌីមៀ ពូទីន បាននិយាយថា អស់រយៈពេល ៨ ឆ្នាំមកនេះប្រជាជននៅតំបន់ Donbass បានទទួលរងនូវអំពើប្រល័យពូជសាសន៍ដោយទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ទូត រុស្ស៊ី នៅអង់គ្លេសបញ្ជាក់ពីលទ្ធភាពប្រើ ឬមិនប្រើអាវុធនុយក្លេអ៊ែរនៅ អ៊ុយក្រែន