ភ្លៀងធ្លាក់ខ្លាំងបង្កជាទឹកជំនន់ និងការបាក់ដី សម្លាប់មនុស្ស ៧៩នាក់នៅ ប្រេស៊ីល

ភ្លៀងធ្លាក់ខ្លាំងនៅភាគឦសានប្រទេសប្រេស៊ីល​ បានបណ្តាលឲ្យមនុស្សចំនួន៧៩នាក់ស្លាប់ និងរាប់សិបនាក់បាត់ខ្លួន ខណៈក្រុមជួយសង្គ្រោះ នៅតែបន្តស្វែងរកអ្នកនៅរស់រានមានជីវិត។

អាជ្ញាធរការពារជនស៊ីវិលរដ្ឋ Pernambuco បាននិយាយថា “គិតត្រឹមម៉ោង ៦:០០ ល្ងាចថ្ងៃអាទិត្យទី២៩ខែឧសភា ចំនួនមនុស្សស្លាប់ដោយសារភ្លៀងធ្លាក់បានកើនឡើងដល់ ៧៩នាក់”។

គ្រោះមហន្តរាយនេះ គឺជាគ្រោះមហន្តរាយថ្មីបំផុត ពាក់ព័ន្ធការរអិលបាក់ដី និងទឹកជំនន់ ដែលបង្កឡើងដោយអាកាសធាតុអាក្រក់ ក្នុងប្រទេសប្រេស៊ីល។

ចំនួនអ្នកស្លាប់បានកើនឡើងជាបន្តបន្ទាប់កាលពីចុងសប្តាហ៍ រួមទាំងមនុស្សមួយចំនួន ដែលស្លាប់ក្នុងបំណាក់ដីផងដែរ ស្របពេលភ្លៀងធ្លាក់ខ្លាំង បានបណ្តាលឲ្យទឹកទន្លេឡើងខ្ពស់ និងវាយប្រហារតំបន់នានា។

សេចក្តីថ្លែងការណ៍ចុងក្រោយបង្អស់របស់អាជ្ញាធរការពារស៊ីវិល មិនបានផ្តល់នូវបច្ចុប្បន្នភាពអំពីចំនួនមនុស្សបាត់ខ្លួននោះទេ ថ្វីបើទីភ្នាក់ងារនេះ បានរាយការណ៍ថា មនុស្សចំនួន៥៦នាក់ នៅតែរកមិនទាន់ឃើញ និងជិត ៤០០០ នាក់ត្រូវបាត់បង់ផ្ទះសម្បែងក៏ដោយ។

គួរបញ្ជាក់ថា កាលពីឆ្នាំមុន ប្រជាជនប្រេស៊ីលរាប់រយនាក់ បានស្លាប់ក្នុងគ្រោះទឹកជំនន់ និងការរអិលបាក់ដី ដែលបង្កឡើងដោយភ្លៀងធ្លាក់ខ្លាំង។

នៅខែកុម្ភៈ មនុស្សជាង២៣០នាក់ បានស្លាប់ក្នុងទីក្រុង Petropolis នៃរដ្ឋ Rio de Janeiro រីឯកាល​ពី​ដើម​ខែ​មុន មនុស្សចំនួន ១៤ នាក់​ទៀត​ត្រូវ​បាន​សម្លាប់​ដោយ​ទឹក​ជំនន់ និង​ការ​បាក់​ដី​ក្នុង​រដ្ឋដដែលនេះ៕

ប្រែសម្រួល៖ Vann Vann

ប្រភព៖ AFP

ចុចអាន៖ ថតជាប់ពិតៗ បាក់ផ្ទាំងថ្មសម្លាប់អ្នកទេសចរនៅ ប្រេស៊ីល