មីស៊ីលវាយប្រហារ មូលដ្ឋានដាក់ទ័ពអាមេរិក នៅ អ៊ីរ៉ាក់

ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃចន្ទទី៣០ខែឧសភាថា មូលដ្ឋានទ័ព Ain al-Assad នៅភាគខាងលិចប្រទេសអ៊ីរ៉ាក់ ជាកន្លែងដែលកងកម្លាំងអាមេរិកកំពុងឈរជើង ត្រូវរងការបាញ់ប្រហារពីគ្រាប់មីស៊ីល ១២២មិល្លីម៉ែត្រ។

យោងតាម​របាយការណ៍​​បឋម, យ៉ាងហោចណាស់​មានមីស៊ីលចំនួន​ពីរ​គ្រាប់ ​បាន​ធ្លាក់លើ​មូលដ្ឋាននេះ។ ទោះបីជាយ៉ាងណាក៏ដោយ នៅខណៈពេលនេះ ទំហំនៃការខូចខាត និងចំនួនជនរងគ្រោះ មិនទាន់ត្រូវបានបញ្ជាក់នោះទេ។ គេក៏មិនទាន់ច្បាស់ដែរថា អ្វីជាគោលដៅនៃការវាយប្រហារឲ្យពិតប្រាកដ។

ជាងនេះទៅទៀត បន្ទាប់ពីការវាយប្រហារ អាមេរិក បានដាក់ពង្រាយយន្តហោះគ្មានមនុស្សបើក និងឧទ្ធម្ភាគចក្រ ក្នុងភូមិ Al-Baghdadi ស្ថិតនៅក្បែរនោះ។

មីស៊ីលបានវាយប្រហារផ្នែកខាងត្បូងនៃមូលដ្ឋាន ហើយភ្លាមៗបន្ទាប់ពីនោះ កងកម្លាំងអាមេរិកបានបិទទ្វារទាំងអស់នៃមូលដ្ឋាន។

គួរបញ្ជាក់ថា មូលដ្ឋានដែលនៅតែដាក់កងទ័ពអាមេរិក បើទោះបីជាសភាអ៊ីរ៉ាក់បានបោះឆ្នោតបណ្តេញកងទ័ពបរទេសទាំងអស់ចេញពីទឹកដីរបស់ខ្លួនទៅហើយក៏ដោយនោះ បានរងការបាញ់ផ្លោងជាញឹកញាប់។

ការវាយប្រហារដ៏ធ្ងន់ធ្ងរមួយ គឺជាការវាយប្រហារដោយមីស៊ីលអ៊ីរ៉ង់កាលពីខែមករាឆ្នាំ ២០២០ ដើម្បីសងសឹកចំពោះការដែលកងកម្លាំងសហរដ្ឋអាមេរិកសម្លាប់លោកឧត្តមសេនីយ៍ Qasem Soleimani៕

ប្រែសម្រួល៖ Vann Vann

ប្រភព៖ Sputnik

ចុចអាន៖ លោក បៃដិន សម្រេចមិនបញ្ជូន ប្រព័ន្ធរ៉ុកកែតដែលអាចបាញ់ដល់រុស្ស៊ី ទៅឲ្យ អ៊ុយក្រែន ទេ