ស្រីលង្កា អង្វរឲ្យកសិករ ធ្វើស្រែបន្ថែមទៀត ខណៈបញ្ហាកង្វះខាតស្បៀងអាហារ ធ្ងន់ធ្ងរទៅៗ

ប្រទេសស្រីលង្កា បានអង្វរឲ្យកសិករ ធ្វើស្រែបន្ថែមទៀត ដែលជាផ្នែកនៃផែនការដើម្បីបញ្ចៀសបញ្ហាកង្វះខាតស្បៀងអាហារធ្ងន់ធ្ងរ ខណៈអ្នកជំនាញ បានព្រមានអំពីការធ្លាក់ចុះនៃផលិតកម្មចំនួន៥០ភាគរយ ដែលនឹងធ្វើឲ្យផលប៉ះពាល់កាន់តែខ្លាំងចំពោះវិបត្តិហិរញ្ញវត្ថុដែលយ៉ាប់យ៉ឺនរួចទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេស​ស្រីលង្កា​ បានស្ថិត​ក្នុង​វិបត្តិ​ដ៏​អាក្រក់​បំផុត​របស់​ខ្លួន​ក្នុង​រយៈពេល​ជាង​ប្រាំពីរ​ទសវត្សរ៍មកនេះ។ កោះដែលមានប្រជាជនចំនួន ២២ លាននាក់មួយនេះ អស់ទុនបម្រុងប្តូរប្រាក់បរទេសហើយ ហើយមិនអាចបង់ថ្លៃសម្រាប់ការនាំចូលសំខាន់ៗដូចជាប្រេងឥន្ធនៈ អាហារ និងថ្នាំពេទ្យនោះទេ។

រដ្ឋមន្ត្រីក្រសួងកសិកម្ម លោក Mahinda Amaraweera បានប្រាប់សន្និសីទសារព័ត៌មានកាលពីថ្ងៃអង្គារទី៣១ខែឧសភាថា វាច្បាស់ណាស់ថា ស្ថានភាពស្បៀងអាហារនឹងកាន់តែអាក្រក់ទៅៗ។ យើងស្នើសុំឲ្យកសិករទាំងអស់ ចូលស្រែចម្ការរបស់ពួកគេវិញក្នុងរយៈពេល៥ទៅ១០ថ្ងៃខាងមុខ។

ស្របពេលជាមួយគ្នានោះ នាយករដ្ឋមន្ត្រីថ្មីរបស់ប្រទេសស្រីលង្កា លោក Ranil Wickremesinghe បានព្រមានអំពីកង្វះខាតស្បៀងអាហារធ្ងន់ធ្ងរនៅខែសីហា ហើយប៉ាន់ស្មានថា ទឹកប្រាក់៦០០លានដុល្លារ នឹងត្រូវការជាចាំបាច់សម្រាប់ការនាំចូលជី ដែលប្រទេសនេះកំពុងត្រូវការ។

ក្រុមអ្នកជំនាញកសិកម្មបានព្រមានថា ជីភាគច្រើននឹងមកដល់យឺតពេកសម្រាប់រដូវធ្វើស្រែ ដែលជាធម្មតាចាប់ផ្តើមនៅដើមខែមិថុនា។

កិច្ចពិភាក្សាកំពុងដំណើរការជាមួយប្រទេសឥណ្ឌា ដើម្បីទិញជីចំនួន ៦៥ ០០០តោន ហើយការអំពាវនាវត្រូវបានធ្វើឡើងទៅកាន់ប្រទេសចំនួនប្រាំពីរផ្សេងទៀត៕

ប្រែសម្រួល៖ Vann Vann

ប្រភព៖ CNA

ចុចអាន៖ ស្ថានការណ៍កាន់តែវឹកវរ! បាតុករដុតកម្ទេច ផ្ទះមេដឹកនាំ ស្រីលង្កា