ប្រទេសជាប់ កម្ពុជា រកឃើញករណីជំងឺអុតស្វាលើកដំបូង លើអ្នកដំណើរ ឆ្លងកាត់ប្រទេស (មានវីដេអូ)

ប្រទេសថៃបានរាយការណ៍ពីការរកឃើញករណីដំបូងនៃជំងឺអុតស្វា (Monkeypox) លើអ្នកដំណើរឆ្លងកាត់តាមផ្លូវអាកាសមកពីទ្វីបអឺរ៉ុប ហើយឈប់នៅអាកាសយានដ្ឋានអន្តរជាតិក្នុងទីក្រុងបាងកក ប្រហែល ២ ម៉ោង មុនពេលធ្វើដំណើរទៅកាន់ប្រទេសអូស្ត្រាលី ។

បើ​តាម​លោក​វេជ្ជបណ្ឌិត Chakkarat Pittayawonganon ប្រធាន​ការិយាល័យ​ជំងឺឆ្លងបានឲ្យដឹងថា មនុស្សចំនួន ១២ នាក់ និងអ្នករួមដំណើរលើជើងហោះហើរតែមួយ ដែលមានជាប់ពាក់ព័ន្ធជិតស្និទ្ធជាមួយអ្នកឆ្លង ឥឡូវនេះត្រូវបានដាក់ឲ្យធ្វើចត្តាឡីស័កក្នុងប្រទេសថៃរយៈពេល ៧ ថ្ងៃ ហើយរហូតមកដល់ពេលនេះពួកគេទាំងនោះមិនទាន់បង្ហាញរោគសញ្ញាណាមួយទាក់ទងនឹងជំងឺអុតស្វាយឡើយ ប៉ុន្តែទោះជាយ៉ាងណា ពួកគេនឹងបន្តដាក់ឲ្យនៅដាច់ដោយឡែករយៈពេល ២១ ថ្ងៃទៀត ។

ទាក់ទិននឹងវិធានការទប់ចំពោះជំងឺអុតស្វានេះ លោកវេជ្ជបណ្ឌិតបាននិយាយទៀតថា អ្នកជំងឺដែលសង្ស័យថាកើតជំងឺអុតស្វាត្រូវបានកំណត់លើអ្នកដែលមានរោគសញ្ញាពងបែកលើមុខ និងដងខ្លួន និងធ្លាប់មានប្រវត្តិទាក់ទងជិតស្និទ្ធជាមួយអ្នកឆ្លងក្នុងរយៈពេល ២១ ថ្ងៃចុងក្រោយ ហើយបានធ្វើដំណើរមកពីប្រទេសដែលមានការផ្ទុះឡើងនៃជំងឺនេះ ក៏ដូចជាមានប្រវត្តិចូលរួមក្នុងសកម្មភាពជាមួយអ្នកឆ្លង ឬស្នាក់នៅរួមបន្ទប់ជាមួយគ្នាជាមួយអ្នកជំងឺ ។

ជាចុងក្រោយលោកវេជ្ជបណ្ឌិត Chakkarat បាននិយាយថា ករណីសង្ស័យនឹងត្រូវឆ្លងកាត់ការធ្វើតេស្ត ការត្រួតពិនិត្យប្រវត្តិ ការតាមដានជំងឺ ការព្យាបាល និងការដាក់ឲ្យធ្វើចត្តាឡីស័ក រហូតទាល់តែមានការបញ្ជាក់ថា ពួកគេពិតជាគ្មានឆ្លងជំងឺនេះ ហើយសម្រាប់អ្នក​ឆ្លងវិញ​នឹង​ត្រូវ​បាន​ផ្តល់​ការ​ព្យាបាល និង​ដាក់ឲ្យនៅ​ដាច់ដោយឡែក​រយៈពេល ២១ ថ្ងៃ​ បន្ទាប់​ពី​ធ្វើ​រោគវិនិច្ឆ័យ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Thai PBS