រុស្ស៊ី គ្រប់គ្រងបន្ទាយចុងក្រោយមួយទៀតរបស់ អ៊ុយក្រែន

អភិបាលតំបន់ Luhansk នៅភាគខាងកើតអ៊ុយក្រែនបាននិយាយថា ឥឡូវនេះកងកម្លាំងរុស្ស៊ីគ្រប់គ្រងទីក្រុង Severodonetsk ដែលជាបន្ទាយដ៏រឹងមាំចុងក្រោយរបស់អ៊ុយក្រែនប្រហែល ៨០ ភាគរយហើយ ។

នៅក្នុងការបង្ហោះប្រព័ន្ធផ្សព្វផ្សាយសង្គមកាលពីថ្ងៃពុធ លោក Serhiy Haidai អភិបាលតំបន់ Luhansk បាននិយាយថា ការប្រកាសពីការគ្រប់គ្រងទីក្រុង Severodonetsk កើតឡើង បន្ទាប់ពីកងកម្លាំងរុស្ស៊ីកំពុងប្រយុទ្ធគ្នានៅតាមដងផ្លូវនៅក្នុងទីក្រុង ហើយការប្រយុទ្ធនេះក៏កំពុងឈានទៅមុខជាលំដាប់ផងដែរ ។

ទោះជាយ៉ាងនេះក្ដីលោក Haidai ​បាន​កត់​សម្គាល់​ថា ទាហាន​អ៊ុយក្រែន​ក៏បានប្រយុទ្ធការពារពីការវាយលុករបស់កង​កម្លាំង​រុស្ស៊ី​នៅ​តាម​ស្រុក​មួយ​ចំនួន ហើយ​ពួក​គេក៏​ចាប់​បាន​ទាហាន​រុស្ស៊ី ៦ នាក់ផងដែរ​ ។

លោកបញ្ជាក់ថា កងទ័ពរុស្ស៊ីកំពុងបង្កើនការវាយលុករបស់ពួកគេនៅក្នុង និងជុំវិញទីក្រុងក្នុងគោលបំណងដាក់តំបន់ Luhansk ទាំងអស់ឲ្យស្ថិតនៅក្រោមការគ្រប់គ្រងរបស់ពួកគេទាំងស្រុង ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ហៅថាជា “ប្រតិបត្តិការយោធាពិសេស” បានអូសបន្លាយពេលជាង ៣ ខែមកហើយ បន្ទាប់ពីផ្ទុះការវាយលុយកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ប្រាប់មូលហេតុមួយទៀតឈ្នះសង្គ្រាមលើ អ៊ុយក្រែន