ប្រទេស តួកគី ប្តូរឈ្មោះថ្មីជាផ្លូវការ

អង្គការសហប្រជាជាតិ (UN) បានប្រកាសកាលពីថ្ងៃពុធទី១ខែមិថុនាថា ឈ្មោះប្រទេស តួកគី (Turkey) ត្រូវបានប្តូរឈ្មោះទៅជា Türkiye វិញ។

ទោះបីជាយ៉ាងណាក៏ដោយ ឈ្មោះថ្មី Türkiye ឥឡូវនេះ ត្រូវបានប្តូរតែជាភាសាបរទេសប៉ុណ្ណោះ ប៉ុន្តែសម្រាប់កម្ពុជាយើង នៅតែហៅថា តួកគី ដដែល ដោយមិនមានប្តូរសំនៀងអ្វីនោះទេ។ 

ថ្លែងទៅកាន់ទីភ្នាក់ងារ Anadolu, អ្នកនាំពាក្យអង្គការសហប្រជាជាតិ លោក Stephane Dujarric បាននិយាយថា ពួកគេបានទទួលសំបុត្រពីរដ្ឋមន្ត្រីការបរទេសតួកគី លោក Mevlut Cavusoglu ដែលផ្ញើទៅកាន់អគ្គលេខាធិការ Antonio Guterres ដោយស្នើសុំឲ្យប្រើប្រាស់ឈ្មោះ “Türkiye” ជំនួសឲ្យពាក្យ “Turkey” នៅក្នុងឆាកអន្តរជាតិ។

អ្នក​នាំ​ពាក្យ​ដដែល​និយាយ​ថា ការ​ផ្លាស់​ប្តូរ​ឈ្មោះ​ប្រទេសនេះ ​មាន​ប្រសិទ្ធភាព​ចាប់​ពី​ពេល​ដែល​សំបុត្រ​ត្រូវ​បាន​ទទួល។

លោក Cavusoglu បានប្រកាសពីការបញ្ជូនជាផ្លូវការនៃលិខិតនេះ ទៅកាន់អង្គការសហប្រជាជាតិ និងអង្គការអន្តរជាតិផ្សេងទៀតកាលពីថ្ងៃអង្គារ។ ថ្លែងទៅកាន់ទីភ្នាក់ងារ Anadolu ក្នុងទីក្រុង អង់ការ៉ា, លោក Cavusoglu និយាយថា “រួមគ្នាជាមួយនាយកទំនាក់ទំនងរបស់យើង យើងទទួលបានជោគជ័យក្នុងការរៀបចំមូលដ្ឋានដ៏ល្អសម្រាប់រឿងនេះ”៕

ប្រែសម្រួល៖ Vann Vann

ប្រភព៖ AA

ចុចអាន៖ តួកគី ប្រឆាំងដាច់ខាតមិនឲ្យ ហ្វាំងឡង់ និងស៊ុយអែត ចូល ណាតូ ដោយលើកហេតុផលមួយ