ប្រទេសអឺរ៉ុបមួយទៀត ប្រកាសផ្តល់អាវុធធុនធ្ងន់ដល់ទីក្រុង កៀវ ថែមទាំងបង្វឹកទាហានអ៊ុយក្រែនទៀតផង (មានវីដេអូ)

ដោយដកស្រង់ប្រភពរដ្ឋាភិបាល កាសែត El Pais បានចុះផ្សាយកាលពីថ្ងៃអាទិត្យទី០៥ខែមិថុនាថា ប្រទេសអេស្ប៉ាញ កំពុងរៀបចំបញ្ជូនអាវុធធុនធ្ងន់ទៅឲ្យអ៊ុយក្រែន រួមមានទាំងមីស៊ីលប្រឆាំងយន្តហោះ និងរថក្រោះ Leopard A4 ប្រហែល ៤០ គ្រឿង ហើយក៏គ្រោងនឹងបណ្តុះបណ្តាលកងទ័ពអ៊ុយក្រែនផងដែរ។

រដ្ឋាភិបាលទីក្រុងម៉ាឌ្រីដ ចង់បណ្តុះបណ្តាលយោធាអ៊ុយក្រែន ឲ្យប្រើរថក្រោះ Leopard A4 ដោយដំណាក់កាលដំបូងនៃការហ្វឹកហាត់គឺស្ថិតនៅក្នុងប្រទេសឡាតវី ដែលជាទីតាំងដាក់រថក្រោះ Leopard 2E ប្រហែល៦គ្រឿង និងទាហានអេស្ប៉ាញ ៥០០ នាក់រួចទៅហើយ ខណៈដំណាក់​កាល​ទី​ពីរ ​នឹង​ប្រព្រឹត្ត​ទៅ​នៅ​ប្រទេស​អេស្ប៉ាញ។

យោងតាមរបាយការណ៍បានឲ្យដឹងថា ក្រសួងការពារជាតិអេស្ប៉ាញឥឡូវនេះ កំពុងធ្វើការ លើការបញ្ជូនមីស៊ីលប្រឆាំងយន្តហោះរយៈចម្ងាយខ្លី Shorad Aspide របស់ខ្លួនទៅកាន់ទីក្រុងកៀវ ហើយមានបំណងស្តារ និងផ្គត់ផ្គង់រថក្រោះធុនធ្ងន់ប្រហែល ៤០គ្រឿងដល់អ៊ុយក្រែន។

កាសែត El Pais បានកត់សម្គាល់ថា ជាមួយនឹងជំហាននេះ អេស្ប៉ាញបានត្រៀមខ្លួនជាស្រេចដើម្បីអនុវត្តវិធានការមិនធម្មតា ព្រោះប្រទេសនេះមិនបានផ្តល់អាវុធធុនធ្ងន់ដល់អ៊ុយក្រែនសោះ ដោយពីមុនបានផ្តល់តែអាវុធធុនស្រាល គ្រាប់បែក និងឧបករណ៍ការពារផ្ទាល់ខ្លួនប៉ុណ្ណោះ។

គួរបញ្ជាក់ថា កាលពីខែមេសា ទីក្រុងម៉ាឌ្រីដ បានបញ្ជូនគ្រាប់បែក សម្ភារយោធា និងយានជំនិះសរុបទម្ងន់ ២០០ តោនទៅឲ្យអ៊ុយក្រែន។ រដ្ឋមន្ត្រីការបរទេសអេស្ប៉ាញលោក Jose Manuel Albares បាននិយាយនៅពេលនោះថា ប្រទេសនេះមិនពិចារណាលើការផ្ទេរអាវុធធុនធ្ងន់ទៅឲ្យអ៊ុយក្រែនឡើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik

ចុចអាន៖ លោក ពូទីន ព្រមាន អ៊ុយក្រែន ខ្លាំងៗ ជុំវិញអាវុធរយៈចម្ងាយឆ្ងាយរបស់បស្ចិមប្រទេស