ប្រធាន​​បក្ស​​ប្រឆាំង​​តៃវ៉ាន់​​ថា «​កុំ​ហៅ​ពួក​​យើង​​ជា​​អ្នក​​គាំទ្រ​​ចិន​ តែ​​ជា​​អ្នក​​គាំទ្រ​​អាមេរិក»

វាជារឿងខុសឆ្គងក្នុងការហៅគណបក្សប្រឆាំងដ៏សំខាន់នៅកោះតៃវ៉ាន់គឺ Kuomintang (KMT) ជាអ្នកគាំទ្រប្រទេសចិន ពីព្រោះខ្លួនតែងតែគាំទ្រអាមេរិកជានិច្ច ហើយប្តេជ្ញាការពារដីកោះ។ ប្រធានគណបក្សបាននិយាយនៅទីក្រុងវ៉ាស៊ីនតោន។

គណបក្ស KMT បានគ្រប់គ្រងប្រទេសចិនរហូតដល់ភៀសខ្លួនទៅកោះតៃវ៉ាន់ក្នុងឆ្នាំ១៩៤៩ បន្ទាប់ពីចាញ់សង្គ្រាមស៊ីវិលទៅគណបក្សកុម្មុយនិស្ត។ ជាប្រពៃណី គណបក្សនេះមានទំនាក់ទំនងជិតស្និទ្ធជាមួយរដ្ឋាភិបាលទីក្រុងប៉េកាំងដែលបានកំពុងបង្កើនការរឹតត្បិតក្នុងការគ្រប់គ្រងលើតៃវ៉ាន់។

គណបក្ស KMTបានចាញ់យ៉ាងអាក្រក់ក្នុងការបោះឆ្នោតប្រធានាធិបតី និងសភាកាលពីឆ្នាំ២០២០ ដែលបានចាញ់គណបក្សវឌ្ឍនភាពប្រជាធិបតេយ្យដែលកំពុងកាន់អំណាច។

និយាយកាលពីល្ងាចថ្ងៃចន្ទ ទី៦ ខែមិថុនា នៅវិទ្យាស្ថាន Brookings អំឡុងពេលដំណើរទស្សនកិច្ចមួយទៅកាន់ទីក្រុងវ៉ាស៊ីនតោន ប្រធានគណបក្ស KMT លោក Eric Chu បានចាត់ទុកអ្នកទាំងនោះជាអ្នកគាំទ្រចិនទៅវិញ។

លោកបាននិយាយថា ៖«យើងខ្ញុំត្រូវបានមនុស្សមួយចំនួនហៅឈ្មោះខុស សារព័ត៌មានខ្លះបានផ្សាយថា យើងខ្ញុំជាអ្នកគាំទ្រចិន។ នោះគឺខុសទាំងស្រុង។ តាមពិតទៅ យើងខ្ញុំជាអ្នកគាំទ្រអាមេរិកជារៀងរហូត»។

លោក Chu ដែលបានក្លាយជាប្រធានគណបក្សកាលពីខែកញ្ញា បន្ថែមថា តៃវ៉ាន់ត្រូវមានសមត្ថភាពការពារដ៏រឹងមាំ។ «ប្រសិនបើអ្នកត្រូវការសន្តិភាព អ្នកត្រូវតែត្រៀមខ្លួនសម្រាប់សង្គ្រាម។ ស្វ័យការពារគឺអាទិភាពលេខ១សម្រាប់សន្តិភាព និងស្ថិរភាព»។

លោក Chu ដែលបានចាញ់ប្រធានាធិបតីតៃវ៉ាន់បច្ចុប្បន្នគឺលោកស្រី​ Tsai Ing-wen នៅពេលឈរឈ្មោះបោះឆ្នោតប្រធានាធិបតីកាលពីឆ្នាំ២០១៦ គឺបេក្ខភាពអាចទៅរួចសម្រាប់ការបោះឆ្នោតប្រធានាធិបតី ឆ្នាំ២០២៤ខាងមុខ ប៉ុន្តែលោកមិនបានប្រកាសពីចេតនាណាមួយក្នុងការចូលរួមប្រកួតប្រជែងឡើយ៕

ប្រែសម្រួល៖ វីរបុត្រ
ប្រភព៖ Reuters