ព័ត៌មានអន្ដរជាតិ

អាមេរិកយល់ព្រមលក់គ្រឿងថែទាំនាវាចម្បាំងទៅតៃវ៉ាន់តម្លៃ១២០លានដុល្លារ

បានផុស

២ years មុន

នៅ

ថ្ងៃព្រហស្បតិ៍ ៩ មិថុនា ២០២២

ដោយ

ក្រសួងការពារជាតិតៃវ៉ាន់បាននិយាយថា សហរដ្ឋអាមេរិកបានអនុម័តលើការលក់គ្រឿងបន្លាស់ និងគ្រឿងជួសជុលថែទាំនាវាចម្បាំងគិតជាប្រាក់១២០លានដុល្លារអាមេរិកដល់កោះតៃវ៉ាន់ដើម្បីធានាបាននូវការត្រៀមខ្លួនទប់ទល់នឹងសកម្មភាពគំរាមកំហែងញឹកញាប់របស់ចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសហប្រតិបត្តិការសន្តិសុខការពារជាតិអាមេរិកបាននិយាយក្នុងសេចក្តីថ្លែងការណ៍មួយថា ខ្លួនបានដាក់សេចក្តីជូនដំណឹងទៅសភារួចហើយ បន្ទាប់ពីក្រសួងការបរទេសអាមេរិកបានអនុម័តសម្រាប់ការលក់ដែលត្រូវបានស្នើសុំទិញរបស់ស្ថានទូតតៃវ៉ាន់ប្រចាំទីក្រុងវ៉ាស៊ីនតោន។

ទីភ្នាក់ងារបាននិយាយថា ការលក់គឺមានគ្រឿងបន្លាស់ គ្រឿងជួសជុលសម្រាប់នាវាចម្បាំង ប្រព័ន្ធនាវាចម្បាំង ជំនួយបច្ចេកទេសភ័ស្តុភារ ការគាំទ្រផ្នែកតំណាងបច្ចេកទេស និងម៉ៅការ។

«ការលក់ដែលត្រូវបានស្នើនឹងរួមចំណែកដល់និរន្តភាពនៃកងនាវាចម្បាំងរបស់តៃវ៉ាន់ ធ្វើឲ្យសមត្ថភាពកាន់តែប្រសើរឡើងដើម្បីតម្រូវតាមការគំរាមកំហែងនាពេលបច្ចុប្បន្ន និងអនាគត»។ ទីភ្នាក់ងារបាននិយាយក្នុងសេចក្តីថ្លែងការណ៍កាលពីថ្ងៃពុធ។

ក្រសួងការពារជាតិតៃវ៉ាន់បាននិយាយថា កិច្ចព្រមព្រៀងត្រូវបានរំពឹងនឹងចូលជាធរមានក្នុងរយៈពេលមួយខែ ហើយក៏បានអរគុណដល់សហរដ្ឋអាមេរិកចំពោះការគាំទ្រក្នុងការជួយដល់តៃវ៉ាន់ឲ្យកាន់តែសមត្ថភាពការពារខ្លួន៕

ប្រែសម្រួល៖ វីរបុត្រ
ប្រភព៖ Reuters