ចិនព្រមានអាមេរិក ថា សង្គ្រាម ច្បាស់ជាផ្ទុះឡើង បើតៃវ៉ាន់ ប្រកាសឯករាជ្យ

ទីក្រុងប៉េកាំង នឹងមិនស្ទាក់ស្ទើរឡើយ ក្នុងការចាប់ផ្តើមសង្គ្រាម ប្រសិនបើកោះតៃវ៉ាន់ ប្រកាសឯករាជ្យ។ នេះបើតាមការព្រមានរបស់រដ្ឋមន្ត្រីការពារជាតិចិន ទៅកាន់សមភាគីអាមេរិក កាលពីថ្ងៃសុក្រទី១០ខែមិថុនា។

ការព្រមាននេះបានកើតឡើង អំឡុងពេលដែលលោក Wei Fenghe ជួបប្រជុំទល់មុខគ្នាជាលើកដំបូង​ ជាមួយរដ្ឋមន្ត្រីការពារជាតិសហរដ្ឋអាមេរិកលោក Lloyd Austin នៅខាងក្រៅកិច្ចប្រជុំកំពូលសន្តិសុខ Shangri-La Dialogue ក្នុងប្រទេសសិង្ហបុរី។

លោក Wei បានព្រមានលោក Austin ថា “ប្រសិនបើអ្នកណាម្នាក់ហ៊ានបំបែកកោះតៃវ៉ាន់ចេញពីប្រទេសចិន នោះកងទ័ពចិនប្រាកដជាមិនស្ទាក់ស្ទើរឡើយ ក្នុងការចាប់ផ្តើមសង្គ្រាម ទោះបីជាក្នុងតម្លៃណាក៏ដោយ”។

ស្របពេលជាមួយគ្នានោះ រដ្ឋមន្ត្រីចិន ក៏បានប្តេជ្ញាដែរថា ទីក្រុងប៉េកាំងនឹងកម្ទេចរាល់ផែនការ ឯករាជ្យភាពតៃវ៉ាន់ និងរក្សាការបង្រួបបង្រួមជាតិមាតុភូមិយ៉ាងម៉ឺងម៉ាត់។ លោកបានសង្កត់ធ្ងន់ថា តៃវ៉ាន់គឺជាតៃវ៉ាន់របស់ចិន។ ការប្រើតៃវ៉ាន់ដើម្បីទប់ស្កាត់ចិន នឹងមិនអាចឈ្នះបានឡើយ។

គួរបញ្ជាក់ថា ភាព​តានតឹង​រវាង​សហរដ្ឋអាមេរិក និង​ចិន ​កំពុង​កើនឡើង​ខ្លាំងជុំវិញបញ្ហាកោះ​តៃវ៉ាន់។ ទីក្រុងប៉េកាំង ចាត់ទុកកោះនេះជាទឹកដីរបស់ខ្លួន ហើយបានប្តេជ្ញាថា នឹងរឹបអូសយក នៅថ្ងៃណាមួយដោយប្រើកម្លាំងប្រសិនបើចាំបាច់៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន បញ្ជូន យន្តហោះ ចម្បាំង ៣០ គ្រឿង ចូល តំបន់ ការពារ ដែនអាកាស តៃវ៉ាន់