កូរ៉េខាងជើង តែងតាំងបេសកជននុយក្លេអ៊ែរជា រដ្ឋមន្ត្រីការបរទេស និងជា ស្ត្រីដំបូងបំផុតរបស់ប្រទេស

ទីភ្នាក់ងារសារព័ត៌មានកណ្តាលកូរ៉េ (KCNA) បានចុះផ្សាយកាលពីថ្ងៃសៅរ៍ថា អតីតអនុរដ្ឋមន្ត្រីការបរទេសលោកស្រី Choe Son Hui ត្រូវបានតែងតាំងជារដ្ឋមន្ត្រីការបរទេសស្ត្រីដំបូងបំផុតរបស់ប្រទេសកូរ៉េខាងជើង ។

លោកស្រី Choe ដែលជាសមាជិកដ៏យូរលង់នៃក្រុមចរចានុយក្លេអ៊ែររបស់ប្រទេសកូរ៉េខាងជើង ត្រូវបានតែងតាំងជារដ្ឋមន្ត្រីការបរទេស បន្ទាប់ពីកិច្ចប្រជុំពេញអង្គនៃគណៈកម្មាធិការកណ្តាលរបស់គណបក្សពលករកូរ៉េ ដែលបានចាប់ផ្ដើមពីថ្ងៃទី ៨ ដល់ថ្ងៃទី ១០ ខែមិថុនា និងត្រូវបានដឹកនាំផ្ទាល់ដោយមេដឹកនាំកូរ៉េខាងជើងលោក គីម ជុងអ៊ុន ។

KCNA បានរាយការណ៍ថា ការតែងតាំងលោកស្រី Choe គឺដោយសារតែទីក្រុងព្យុងយ៉ាងមានបំណងជំរុញការគាំទ្រដល់យោធាកូរ៉េខាងជើង ក៏ដូចជាកិច្ចខិតខំប្រឹងប្រែងស្រាវជ្រាវការពារជាតិដើម្បីរក្សាសិទ្ធិអធិបតេយ្យភាពរបស់ខ្លួននៅលើឧបទ្វីបកូរ៉េ ។

យោងតាមសារព័ត៌មាន ​​CNN បានចុះផ្សាយថា ស្នាដៃចុងក្រោយរបស់លោកស្រី Choe គឺជាសេចក្ដីថ្លែងការណ៍ទៅកាន់សហរដ្ឋអាមេរិកកាលពីឆ្នាំមុន ពោលលោកស្រីបានទាមទារឲ្យទីក្រុងវ៉ាស៊ីនតោនបញ្ឈប់ “គោលនយោបាយអរិភាព” របស់ខ្លួនប្រឆាំងនឹងទីក្រុងព្យុងយ៉ាង ដែលរួមមានសមយុទ្ធរួមគ្នាជាមួយទីក្រុងសេអ៊ូលជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន កំពុងចាញ់សង្គ្រាម ព្រោះតែ រុស្ស៊ី មានកាំភ្លើងធំច្រើនជាង ១០ ទៅ ១៥ ដង