ទីបំផុត WHO ទទួលស្គាល់ថា ការផ្ទុះឡើងនៃជំងឺអុតស្វាគឺ គួរឲ្យព្រួយបារម្ភ

នៅទីបំផុត ប្រមុខអង្គការសុខភាពពិភពលោក (WHO) លោក Tedros Adhanom Ghebreyesus បានទទួលស្គាល់ថា “ការផ្ទុះឡើងនៃជំងឺអុតស្វាគឺមិនធម្មតា និងគួរឲ្យព្រួយបារម្ភ”។

លោកនិយាយថា “សម្រាប់ហេតុផលនោះ ខ្ញុំបានសម្រេចចិត្តកោះប្រជុំគណៈកម្មាធិការគ្រាអាសន្នក្រោមបទប្បញ្ញត្តិសុខភាពអន្តរជាតិនៅសប្តាហ៍ក្រោយ ដើម្បីវាយតម្លៃថាតើ ការផ្ទុះឡើងនេះតំណាងឲ្យភាពអាសន្នផ្នែកសុខភាពសាធារណៈ ដែលត្រូវព្រួយបារម្ភជាអន្តរជាតិដែរឬក៏អត់”។

ជំងឺអុតស្វា គឺបង្កឡើងដោយមេរោគ Monkeypox ដែលជាសមាជិកនៃក្រុមមេរោគដូចគ្នាទៅនឹងជំងឺអុតស្វាយ ថ្វីបើមិនសូវធ្ងន់ធ្ងរក៏ដោយ។ លោកបានលើកឡើងបែបនេះ ស្របពេលដែល WHO និយាយថា ខ្លួនកំពុងធ្វើការជាមួយក្រុមអ្នកជំនាញ ដើម្បីបង្កើតឈ្មោះថ្មីសម្រាប់ជំងឺអុតស្វា។

រឿងនេះកើតឡើងបន្ទាប់ពីអ្នកវិទ្យាសាស្ត្រជាង ៣០ នាក់បានសរសេរកាលពីសប្តាហ៍មុន អំពីតម្រូវការជាបន្ទាន់សម្រាប់ឈ្មោះមិនរើសអើង សម្រាប់មេរោគ និងជំងឺដែលវាបង្កឡើង។

ពួកគេនិយាយថា ការបន្តសំដៅទៅលើមេរោគនេះថាជា ជនជាតិអាហ្រ្វិកគឺមានភាពមិនត្រឹមត្រូវ និងរើសអើង។ ឈ្មោះថ្មីមួយសម្រាប់ជំងឺអុតស្វា ដែលត្រូវបានណែនាំដោយអ្នកវិទ្យាសាស្ត្រគឺ hMPXV ប៉ុន្តែយើងត្រូវរង់ចាំស្តាប់ថាតើ WHO គិតយ៉ាងណាចំពោះឈ្មោះនេះ។

គួរបញ្ជាក់ថា ករណីជំងឺអុតស្វាចំនួន ១៦០០ ត្រូវបានកត់ត្រាទូទាំងពិភពលោក ក្នុងរយៈពេលប៉ុន្មានសប្តាហ៍ថ្មីៗនេះ៕

ប្រែសម្រួល៖ សន្យា

ប្រភព៖ BBC

ចុចអាន៖ WHO កំពុងរកឈ្មោះថ្មី ដាក់ឲ្យជំងឺអុតស្វា