អង់គ្លេស ថា អ៊ុយក្រែន ចាញ់អាវុធកាំភ្លើងធំ រុស្ស៊ី ២០ ទល់នឹង ១

រដ្ឋមន្ត្រីការពារជាតិអង់គ្លេសលោក Ben Wallace បាននិយាយកាលពីថ្ងៃព្រហស្បតិ៍ថា ប្រទេសរុស្ស៊ីមានអាវុធកាំភ្លើងធំច្រើនជាងអ៊ុយក្រែនរហូតដល់ទៅ ២០ ទល់នឹង ១ ប៉ុន្តែទោះយ៉ាងណាលោកខាងលិចនៅតែមានបំណងបន្តផ្គត់ផ្គង់អាវុធដល់រដ្ឋាភិបាលទីក្រុងដដែរ ។

​បន្ទាប់​ពី​កិច្ច​ប្រជុំ​របស់​រដ្ឋ​មន្ត្រី​ការពារ​ជាតិ​ណាតូ​ក្នុង​ទីក្រុង​ព្រុចសែល, លោក Wallace បាន​និយាយថា ​“នៅ​តំបន់​ខ្លះ​ទាហាន​អ៊ុយក្រែន​មាន​ចំនួន​ច្រើន​ជាងទាហានរុស្ស៊ីមែន ប៉ុន្តែកាំភ្លើងធំដែលមាននៅក្នុងដៃរបស់ពួកគេគឺចាញ់រុស្ស៊ីរហូតដល់ ២០ ទល់ ១” ។

លោករដ្ឋមន្ត្រីបានកត់សម្គាល់ថា បណ្តាប្រទេសនៅអឺរ៉ុប និងសហរដ្ឋអាមេរិកនៅតែមានបំណង និងចាប់ផ្តើមផ្គត់ផ្គង់កាំភ្លើងធំបាញ់បានឆ្ងាយដល់អ៊ុយក្រែន ហើយវានឹងអាចអនុញ្ញាតឲ្យទីក្រុងកៀវបង្កើតវឌ្ឍនភាពដ៏សំខាន់ក្នុងការប្រយុទ្ធនៅភាគខាងកើតនៃប្រទេស” ។

ជាចុងក្រោយលោក Wallace បាននិយាយថា បច្ចុប្បន្នចក្រភពអង់គ្លេសក៏បានជួសជុលរថពាសដែកធុន M109 ជាង ២០ គ្រឿងដែលទិញមកពីក្រុមហ៊ុនបែលហ្ស៊ិក ហើយត្រៀមនឹងត្រូវទៅបញ្ជូនទៅអ៊ុយក្រែនផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក បង្ហាញខ្ទង់ចំណាយក្នុងមួយខែៗលើរដ្ឋាភិបាល អ៊ុយក្រែន