​រុស្ស៊ី​ បញ្ចេញ​វីដេអូដំបូង នៃ​​ទាហាន​ស៊ីឈ្នួល​អាមេរិក ​ដែល​ត្រូវ​បានចាប់ខ្លួន

កាលពីដើមខែនេះ ទាហានស៊ីឈ្នួលបរទេសចំនួន៣នាក់ ដែលប្រយុទ្ធដើម្បីអ៊ុយក្រែន និងចាប់ខ្លួនបានដោយសាធារណរដ្ឋប្រជាមានិត Donetsk (DPR) ត្រូវបានកាត់ទោសប្រហារជីវិតសម្រាប់សកម្មភាពរបស់ពួកគេ។

អ្នក​ទាំង​បី ​គ្រោង​នឹង​ប្តឹង​ឧទ្ធរណ៍​លើ​ការ​សម្រេច​ចិត្ត​នេះ ហើយសង្ឃឹមថា នឹងទទួលទោសជាប់គុកមួយជីវិតជំនួសវិញ។

ដោយឡែក នៅថ្ងៃនេះ ប្រព័ន្ធផ្សព្វផ្សាយរុស្ស៊ីបានចេញវីដេអូមួយចំនួន នៃទាហានស៊ីឈ្នួលអាមេរិក២នាក់ ដែលត្រូវបានគេសន្មត់ថា ចាប់បានដោយទាហានរុស្ស៊ីនៅជិតទីក្រុង Kharkov ជាកន្លែងដែលពួកគេបានប្រយុទ្ធឲ្យកងទ័ពអ៊ុយក្រែន។

វីដេអូដំបូងដែលចេញផ្សាយដោយ RT បានបង្ហាញពីលោក Alexander Drueke មកពីទីក្រុង Tuscaloosa នៃរដ្ឋ Alabama ដែលនិយាយថា គាត់នៅរស់ ហើយសង្ឃឹមថានឹងត្រលប់មកផ្ទះវិញឲ្យបានឆាប់តាមដែលអាចធ្វើទៅបាន។ នៅក្នុងវីដេអូទីពីរ Drueke ក៏និយាយដែរថា គាត់ “ប្រឆាំងនឹងសង្រ្គាម”។

ទាហានស៊ីឈ្នួលទីពីរ ឈ្មោះ Andy Huynh មកពីទីក្រុង Hartselle នៃរដ្ឋ Alabama ដូចគ្នាក៏បានបញ្ជាក់នៅមុខកាមេរ៉ាដែរថា គាត់ “ប្រឆាំងនឹងសង្រ្គាម”។

គួរបញ្ជាក់ថា នេះជាលើកទីមួយហើយ ដែលទាហានស៊ីឈ្នួលអាមេរិកទាំងពីរនាក់ ត្រូវបានគេឃើញតាមវីដេអូ ចាប់តាំងពីមានសេចក្តីរាយការណ៍ថា ពួកគេត្រូវបានចាប់ខ្លួនដោយកងកម្លាំងរុស្ស៊ី នៅប្រទេសអ៊ុយក្រែន៕

ចុចទីនេះដើម្បីចូលទៅទស្សនាវីដេអូ!

ប្រែសម្រួល៖ Vann Vann

ប្រភព៖ Sputnik

ចុចអាន៖​ ពូទីន ថ្កោលទោសទណ្ឌកម្មលោកខាងលិច ថាជា “រឿងឆ្កួត និងគ្មានការពិចារណា”