លោក ពូទីន ថា រុស្ស៊ី មិនខ្វល់ពី អ៊ុយក្រែន ទទួលបានឋានៈបេក្ខភាព អឺរ៉ុប ឡើយ

ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយកាលពីថ្ងៃសុក្រថា ប្រទេសរុស្ស៊ីមិនខ្វល់ពីអ៊ុយក្រែនអាចទទួលបានឋានៈបេក្ខភាពសហភាពអឺរ៉ុបនោះទេ ដោយសារតែសហភាពអឺរ៉ុបមិនមែនជាអង្គការយោធាឡើយ ។

ថ្លែងនៅក្នុងកិច្ចប្រជុំពេញអង្គនៃវេទិកាសេដ្ឋកិច្ចអន្តរជាតិទីក្រុង St. Petersburg លោក ពូទីន បានចោទសួរថាតើការចូលជាសមាជិកសហភាពអឺរ៉ុបនឹងផ្តល់ផលប្រយោជន៍ដល់អ៊ុយក្រែនដែរឬទេ និងថាតើលោកខាងលិចមានចំណាប់អារម្មណ៍ក្នុងការផ្តល់ជំនួយហិរញ្ញវត្ថុមួយចំនួនដល់ទីក្រុងកៀវដើម្បីរក្សាភាពស្មោះត្រង់របស់ខ្លួនជាជាងគាំទ្រដល់កំណើនសេដ្ឋកិច្ច និងឧស្សាហកម្មអឺរ៉ុបដែរឬទេ ។

ចំពោះទំនាក់ទំនងនាពេលអនាគតជាមួយអ៊ុយក្រែនវិញ លោក ពូទីន បាននិយាយថា ទីក្រុងមូស្គូនៅតែមានឆន្ទៈក្នុងការកសាងទំនាក់ទំនងជាមួយនរណាម្នាក់ ប៉ុន្តែមានតែកងទ័ពជើងគោក និងកងទ័ពជើងទឹករបស់យើងប៉ុណ្ណោះដែលអាចជាអ្នកធានាសន្តិសុខរបស់យើងបាន” ។

លោក ពូទីន សង្កត់ធ្ងន់ថា “​មិន​យូរ​មិន​ឆាប់​ស្ថានការណ៍​នឹង​មាន​ភាព​ប្រក្រតីឡើងវិញ ហើយយើងសូមធានាថា អ្នកជិតខាងរបស់យើងទាំងអស់នឹងមានភាពរុងរឿង ដូច្នេះបន្ទាប់មកនឹងមានភាពច្បាស់លាស់ក្នុងការស្តារទំនាក់ទំនងឡើងវិញរវាងរុស្ស៊ី និងអ៊ុយក្រែន” ។

ជាចុងក្រោយលោក ពូទីន បានរំលឹកឡើងវិញថា សកម្មភាពយោធារបស់រុស្ស៊ីនៅអ៊ុយក្រែនគឺជា “វិធានការបង្ខំ” ដោយសារតែ​​រុស្ស៊ី​គ្មាន​វិធី​ផ្សេង​ទៀត​ក្នុង​ការ​ពន្យល់​ទៅ​លោក​ខាង​លិច​ថា ការ​អូសទាញ​អ៊ុយក្រែនចូល​ទៅ​ក្នុង​អង្គការ​ណាតូ គឺ​ជា​អំពើ​ឧក្រិដ្ឋកម្ម នោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អង់គ្លេស ថា អ៊ុយក្រែន ចាញ់អាវុធកាំភ្លើងធំ រុស្ស៊ី ២០ ទល់នឹង ១