អ៊ុយក្រែន ប្រាប់ទំហំទឹកប្រាក់ត្រូវការប្រចាំខែដើម្បីស្ដារប្រទេសឡើងវិញ

ប្រធានគណៈកម្មាធិការសភាស្តីពីហិរញ្ញវត្ថុ ពន្ធដារ និងគោលនយោបាយគយរបស់ទីក្រុងកៀវលោក Danylo Hetmantsev បាននិយាយថា រដ្ឋាភិបាលអ៊ុយក្រែនត្រូវការប្រាក់ចំនួន ៥ ពាន់លានដុល្លារជារៀងរាល់ខែដើម្បីស្ដារប្រទេសវិញ បន្ទាប់ពីសង្គ្រាមលុកលុយរបស់រុស្ស៊ី ។

លោក Hetmantsev បានឲ្យដឹងថា “យើង​ត្រូវ​ខ្ចី​ប្រាក់ ៥ ​ពាន់​លាន​ដុល្លារ​ក្នុង​មួយ​ខែ ហើយប្រសិន​បើ​យើង​មិន​ទទួល​បាន​ទេ យើង​នឹង​ត្រូវ​កាត់​បន្ថយ​ការ​ចំណាយ ប៉ុន្តែបច្ចុប្បន្ន​សេដ្ឋកិច្ចរបស់យើងមិនអាចឈានដល់​​ការ​ដំឡើង​ពន្ធនោះទេ ។ យើងមិនអាចធ្វើដោយគ្មានជំនួយពីដៃគូរបស់យើងបានទេ ដរាបណាការប្រយុទ្ធនៅតែបន្ត” ។

មន្ត្រីរូបនេះបានបន្ថែមថា រដ្ឋាភិបាលបានប្រមូលពន្ធប្រហែល ៣.៤ ពាន់លានដុល្លារកាលពីខែមុន ប៉ុន្តែបានចំណាយច្រើនជាង ៨.៤ ពាន់លានដុល្លារក្នុងរយៈពេលដូចគ្នានេះ ។

ទោះបីជាអ៊ុយក្រែនបានទទួលប្រាក់កម្ចី និងជំនួយពីសហរដ្ឋអាមេរិក និងអ្នកគាំទ្រមួយចំនួននៅអឺរ៉ុបក៏ដោយ ប៉ុន្តែយោងតាមទិន្នន័យរបស់ក្រសួងហិរញ្ញវត្ថុបង្ហាញថា រដ្ឋាភិបាលទីក្រុងកៀវត្រូវការផ្ដល់ជំនួយសេដ្ឋកិច្ចដោយផ្ទាល់ជាង ៥.១ ពាន់លានដុល្លារនៅចន្លោះខែមករា និងឧសភា ។

កាលពីចុងខែមុន ក្រុមប្រទេស G7 បានយល់ព្រមបញ្ជូនជំនួយចំនួន ១៩.៨ ពាន់លានដុល្លារផ្សេងទៀតទៅកាន់ទីក្រុងកៀវ ស្របពេលជាមួយនឹងកញ្ចប់ជំនួយដ៏ធំសម្បើមចំនួន ៤០ ពាន់លានដុល្លារពីទីក្រុងវ៉ាស៊ីនតោន ប៉ុន្តែមួយផ្នែកជាសព្វាវុធ និងឧបករណ៍យោធាផ្សេងទៀត ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ រុស្ស៊ី បាញ់មីស៊ីលកម្ទេចទីតាំងបញ្ជាការ អ៊ុយក្រែន ស្លាប់ឧត្តមសេនីយ៍ និងទាហានជាង ៥០ នាក់