ប្រទេស អាស៊ាន មួយទៀតរកឃើញករណី ជំងឺអុតស្វា

ក្រសួង​សុខាភិបាលសិង្ហបុរី (MOH) ​បាន​ប្រកាសពីការរកឃើញ​ករណីនាំចូល​​ជំងឺ​ស្វាអុតស្វាមួយករណីនៅថ្ងៃពុធនេះ ។ អ្នកជំងឺគឺ​ជា​ជនជាតិ​អង់គ្លេស វ័យ​ ៤២​ ឆ្នាំ ធ្វើការ​ជា​អ្នកបម្រើ​ការលើ​យន្តហោះ​ ហើយបុរសរូបនោះស្ថិតនៅក្នុងប្រទេសសិង្ហបុរីចន្លោះពីថ្ងៃទី ១៥ ដល់ថ្ងៃទី ១៧ ខែមិថុនា ហើយមកម្តងទៀតនៅថ្ងៃទី ១៩ ខែមិថុនា ។

បុរសនោះចាប់ផ្តើមឈឺក្បាលនៅថ្ងៃទី ១៤ ខែមិថុនា និងគ្រុនក្តៅនៅថ្ងៃទី ១៦ ខែមិថុនា ប៉ុន្តែរោគសញ្ញាទាំងនេះត្រូវបានព្យាបាលជាបន្តបន្ទាប់ ហើយបន្ទាប់មកគាត់បានកើតកន្ទួលលើស្បែកនៅថ្ងៃទី ១៩ ខែមិថុនា ។

MOH បាននិយាយថា បុរសនោះបានជួបពិគ្រោះយោបល់ជាមួយគ្រូពេទ្យតាមទូរស័ព្ទនៅយប់ថ្ងៃទី ១៩ ខែមិថុនា ហើយត្រូវបានបញ្ជូនទៅ NCID នៅថ្ងៃទី ២០ ខែមិថុនា ដើម្បីធ្វើរោគវិនិច្ឆ័យបន្ថែម ។

ក្រោយមកបុរសរូបនោះ​បាន​ធ្វើ​តេស្ត​វិជ្ជមានជំងឺអុត​ស្វា​នៅ​ថ្ងៃ​ទី ២០ ខែ​មិថុនា ហើយបច្ចុប្បន្នអ្នកជំងឺ​កំពុង​សម្រាក​ព្យាបាល​នៅ​មជ្ឈមណ្ឌល​ជាតិ​សម្រាប់​ជំងឺ​ឆ្លង (NCID) ដើម្បីធ្វើការតាមដានរោគសញ្ញាបន្ថែម ។

គិតត្រឹមថ្ងៃទី ២១ ខែមិថុនា អ្នកប៉ះពាល់ផ្ទាល់ជាមួយអ្នកជំងឺចំនួន ១៣ ត្រូវបានកំណត់អត្តសញ្ញាណ ខណៈអ្នកទាំងអស់នោះនឹងត្រូវដាក់ឲ្យនៅដាច់ដោយឡែករយៈពេល ២១ ថ្ងៃ ចាប់តាំងពីទំនាក់ទំនងចុងក្រោយរបស់ពួកគេជាមួយនឹងករណីនេះ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ប្រេងសាំងនៅ កម្ពុជា រក្សាតម្លៃដដែល ចុះចំណែកប្រទេស អាស៊ាន ផ្សេងទៀតយ៉ាងណាដែរ