ប្រធានាធិបតីជាប់ឆ្នោត ហ្វីលីពីន តែងតាំងខ្លួនឯងកាន់តំណែងមួយទៀត

ប្រធានាធិបតីជាប់ឆ្នោតហ្វីលីពីនលោក Ferdinand Marcos Jr. បានតែងតាំងខ្លួនឯងឲ្យកាន់តំណែងមួយទៀតជារដ្ឋមន្ត្រីក្រសួងកសិកម្ម ដើម្បីឆ្លើយតបទៅនឹងការកើនឡើងតម្លៃស្បៀងអាហារ ។

លោក Marcos បានប្រកាសពីការសម្រេចចិត្តនេះនៅមុនការសម្ពោធឡើងកាន់តំណែងជាប្រធានាធិបតីដែលគ្រោងធ្វើនៅថ្ងៃទី ៣០ ខែមិថុនាខាងមុខនេះ ។

ប្រធានាធិបតីជាប់ឆ្នោតរូបនេះបញ្ជាក់ថា តម្លៃម្ហូបអាហារអាចនឹងកើនឡើងនៅក្នុងត្រីមាសខាងមុខនេះ ដោយសារតែបញ្ហាខាងក្រៅ ជាពិសេសសង្រ្គាមនៅអ៊ុយក្រែនដែលបានធ្វើឲ្យមានភាពតានតឹង និងប៉ះពាល់ដល់សង្វាក់ផ្គត់ផ្គង់ពិភពលោក ។

ទន្ទឹមនោះ លោកក៏​បាន​សង្កត់​ធ្ងន់​ពី​តម្រូវការ​ក្នុង​ការ​ដោះស្រាយ​បញ្ហា​ប្រឈម​នៃ​ការ​ឡើង​ថ្លៃ និង​ការ​ជំរុញ​ផលិតកម្ម​ស្បៀងផងដែរ ខណៈក្នុងអំឡុងពេលយុទ្ធនាការបោះឆ្នោតប្រធានាធិបតី, លោក Marcos បានសន្យាថា នឹងកាត់បន្ថយតម្លៃអង្ករលើសពីពាក់កណ្តាល ប្រសិនបើលោកជាប់ឆ្នោត ។

គួរបញ្ជាក់ថា វាជារឿងកម្រណាស់សម្រាប់ហ្វីលីពីនដែលមានប្រធានាធិបតីដឹកនាំប្រទេសផង និងដឹកនាំនាយកដ្ឋានកសិកម្មផងក្នុងពេលដំណាលគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ឡាវ ឲ្យមនុស្សម្នាក់ប្ដូរប្រាក់បានតែ ១០០ ដុល្លារប៉ុណ្ណោះក្នុងមួយថ្ងៃ