ឧត្តមសេនីយ៍រុស្ស៊ី ជំរុញឲ្យលោក ពូទីន បញ្ជូនអាវុធនុយក្លេអ៊ែរទៅ Kaliningrad (មានវីដេអូ)

ឧត្តមសេនីយ៍ចូលនិវត្តន៍រុស្ស៊ីលោក Evgeny Buzhinsky បានជំរុញឲ្យលោកប្រធានាធិបតី វ្ល៉ាឌីមៀរ ពូទីន បញ្ជូនអាវុធនុយក្លេអ៊ែរទៅកាន់តំបន់ Kaliningrad។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ឯក Evgeny Buzhinsky បានប្រាប់ទូរទស្សន៍រដ្ឋរុស្ស៊ីថា លោកខាងលិចកំពុងលេងជាមួយភ្លើង បន្ទាប់ពីការដឹកជញ្ជូនធ្យូងថ្ម លោហធាតុ សម្ភារសំណង់ និងបច្ចេកវិទ្យាទំនើប ត្រូវបានរារាំងមិនឲ្យចូលទៅក្នុងទឹកដីរុស្ស៊ី តាមរយៈរដ្ឋជាសមាជិករបស់ណាតូគឺ ប្រទេសលីទុយអានី។

លោកនិយាយថា ការសម្រេចចិត្តរបស់ប្រទេសលីទុយអានី ដែលហាមឃាត់ការដឹកជញ្ជូនទំនិញជាប់ទណ្ឌកម្ម ទៅកាន់ទីក្រុង Kaliningrad ដែលជាប៉ុស្តិ៍របស់រុស្ស៊ីនៅលើសមុទ្របាល់ទិក ហ៊ុមព័ទ្ធដោយទឹកដីសហភាពអឺរ៉ុបគឺជា “ការគំរាមកំហែង” ដល់សន្តិសុខជាតិរបស់រុស្ស៊ី។

ការជំរុញនេះ កើតឡើងបន្ទាប់ពីអ្នកនាំពាក្យវិមានក្រឹមឡាំងលោក Dmitry Peskov និយាយថា វិបត្តិអ៊ុយក្រែននឹងក្លាយជាជម្លោះយូរអង្វែង ហើយរុស្ស៊ីនឹងលែងទុកចិត្តបស្ចិមប្រទេសទៀតហើយ ជាពិសេសសហរដ្ឋអាមេរិក តែម្តង។

នៅក្នុងបទសម្ភាសន៍ជាមួយទូរទស្សន៍ NBC, លោក Peskov បាននិយាយថា “ពិតណាស់ ជម្លោះអ៊ុយក្រែននឹងអូសបន្លាយពេលយូរអង្វែង ហើយយើងនឹងមិនជឿទុកចិត្តលើលោកខាងលិចទៀតទេ”។

ទាក់ទងនឹងបញ្ហានេះដែរ ឯកអគ្គរដ្ឋទូតរុស្ស៊ីប្រចាំនៅអាមេរិកលោក Anatoly Antonov ធ្លាប់បាននិយាយថា កិច្ចសន្ទនារវាងទីក្រុងវ៉ាស៊ីនតោន និងទីក្រុងមូស្គូបានឈានដល់ការជាប់គាំង ហើយទំនាក់ទំនងទ្វេភាគីដែលធ្លាប់មានយ៉ាងជ្រៅក្នុងរយៈពេលប៉ុន្មានឆ្នាំកន្លងមកនេះ បច្ចុប្បន្នបានឈានដល់ចំណុចសូន្យហើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រជាជនអាមេរិក ត្រឹម ១១% ប៉ុណ្ណោះ ដែលស្តីបន្ទោសលោក ពូទីន ចំពោះ ការឡើងថ្លៃឧស្ម័ន