ថៃ អរគុណ កម្ពុជា ចំពោះការជួយដោះស្រាយបញ្ហាក្រុមឆបោកតាមទូរស័ព្ទ

អ្នកនាំពាក្យក្រសួងការពារជាតិថៃបានឲ្យដឹងកាលពីថ្ងៃអង្គារថា លោកឧត្តមសេនីយ៍ ប្រាវីត វង្សសុវណ្ណ ឧបនាយករដ្ឋមន្ត្រីថៃបានដឹកនាំគណៈប្រតិភូធ្វើដំណើរទៅចូលរួមកិច្ចប្រជុំរដ្ឋមន្ត្រីការពារជាតិអាស៊ានលើកទី១៦ នៅរាជធានីភ្នំពេញនៃព្រះរាជាណាចក្រកម្ពុជា ។ ក្នុងឱកាសនេះដែរ លោក ប្រាវីត បានជួបពិភាក្សាទ្វេភាគីជាមួយសម្ដេច ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារកម្ពុជានៅសណ្ធាគារសុខាភ្នំពេញ ។

ក្នុងជំនួបនោះ ភាគីទាំងពីរបានពិភាក្សាគ្នាក្នុង​ការ​គាំទ្រ​ដល់​សន្តិសុខ និង​សុវត្ថិភាព​របស់​ប្រជាជន​នៃ​ប្រទេស​ទាំង​ពីរ រួមទាំងការពង្រឹង ក៏ដូចជាការឯកភាពគ្នាជាធ្លុងមួយរបស់អាស៊ាន ដើម្បី​សន្តិសុខ និង​សន្តិភាព​ក្នុង​តំបន់ ដោយ​លោក ប្រា​វី​ត វង្សសុវណ្ណ បាន​បញ្ជាក់ពីការអរគុណ​ចំពោះ​ប្រទេស​កម្ពុជា ដែលបានជួយគាំទ្រក្នុងការបង្រ្កាបក្រុមជនឆបោកតាមទូរស័ព្ទ (Call Center) និងដោះស្រាយបញ្ហាឧក្រិដ្ឋកម្មឆ្លងដែននាពេលកន្លងមក រួមទាំងការជួយការពារដល់ប្រជាជនថៃនៅកម្ពុជា និងសន្តិសុខសណ្តាប់ធ្នាប់នៅតាមព្រំដែន ដោយប្រទេសថៃបានត្រៀមខ្លួនរួចជាស្រេចក្នុងការគាំទ្រកិច្ចសហប្រតិបត្តិការខាងយោធាជាមួយក្រសួងការពារជាតិកម្ពុជា និងកិច្ចសហប្រតិបត្តិការស្ថាបនាលើគ្រប់វិស័យ ដើម្បីសុវត្ថិភាព និងសន្តិសុខរួមគ្នារបស់ប្រជាជននៃប្រទេសទាំងពីរ ។

ទន្ទឹមគ្នានេះ សម្ដេច ទៀ បាញ់ ក៏បានថ្លែងអំណរគុណថៃដែលគាំទ្រកម្ពុជាក្នុងការធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីការពារជាតិអាស៊ានលើកទី១៦នេះ ក៏ដូចជាគាំទ្ររួមគ្នានៃយន្តការសន្តិសុខនៅគ្រប់កម្រិត ដែលធ្វើឲ្យលទ្ធផលនៃកិច្ចខិតខំប្រឹងប្រែងផ្នែកសន្តិសុខរួមគ្នានៃប្រទេសទាំងពីរប្រកបដោយការស្ថាបនា ព្រមទាំងសង្កត់ធ្ងន់ថា យើងចាំបាច់ត្រូវធ្វើការយ៉ាងជិតស្និទ្ធជាមួយគ្នា ដើម្បីពង្រឹងភាពរឹងមាំក្នុងតំបន់ ក្នុងស្ថានការណ៍ និងពិភពលោក ដែលមាន​ភាពលំបាក និង​ស្មុគ​ស្មាញ​កាន់​តែ​ខ្លាំង ដោយ​កម្ពុជាបាន​ត្រៀម​ខ្លួន​ជា​ស្រេច​ក្នុង​ការ​គាំទ្រ និង​សហការ​ជាមួយ​ប្រទេស​ថៃ ៕

ប្រែសម្រួលដោយ ៖ គង់ សំអាន

ប្រភព ៖ Thaipost

ចុចអាន ៖ ឡាវ គ្រោងលក់អគ្គិសនីរាប់ពាន់មេហ្គាវ៉ាត់ឲ្យប្រទេស ៣ នៅអាស៊ាន រួមទាំង កម្ពុជា ផងដែរ