អាមេរិក គំរាមរុស្ស៊ី បើហ៊ានវាយប្រហារ លីទុយអានី

សហរដ្ឋអាមេរិកបាននិយាយកាលពីថ្ងៃពុធទី២២ខែមិថុនាថា ការគាំទ្ររបស់ខ្លួនចំពោះប្រទេសលីទុយអានី គឺរឹងដូចដែក ហើយថា ការវាយប្រហារណាមួយលើប្រទេសនេះ គឺស្មើនឹងការវាយប្រហារលើសមាជិកណាតូទាំងអស់។

ការអះអាងនេះកើតឡើង បន្ទាប់ពីទីក្រុងមូស្គូ បានគំរាមកំហែងអ្នកជិតខាងរបស់ខ្លួនថានឹង ជួបផលប៉ះពាល់យ៉ាងធ្ងន់ធ្ងរ សម្រាប់ការរារាំងទំនិញដែលដាក់ទណ្ឌកម្មដោយសហភាពអឺរ៉ុប មិនឲ្យទៅដល់តំបន់ Kaliningrad របស់រុស្ស៊ី។

ទន្ទឹមនឹងនេះ អ្នកនាំពាក្យក្រសួងការបរទេសអាមេរិក លោក Ned Price បាននិយាយថា “យើងឈរនៅខាងសម្ព័ន្ធមិត្តណាតូរបស់យើង ហើយយើងឈរខាងប្រទេសលីទុយអានី ជាពិសេស ការប្តេជ្ញាចិត្តរបស់យើងចំពោះមាត្រា៥របស់អង្គការណាតូ ដែលចែងថា ការវាយប្រហារលើសមាជិកមួយ គឺជាការវាយប្រហារលើសមាជិកទាំងអស់”។

ទោះបីជាយ៉ាងណាក៏ដោយ អនុរដ្ឋមន្ត្រីការបរទេសរុស្ស៊ី លោក Sergei Ryabkov បានវាយបកទៅវិញ ហើយព្រមានលោកខាងលិចឲ្យឈប់និយាយអំពីមាត្រា៥របស់អង្គការណាតូទៀត ក្នុងពេលមានការប្រឈមមុខដាក់គ្នារវាង លីទុយអានី និងរុស្ស៊ី។

ទីភ្នាក់ងារព័ត៌មាន Interfax បានដកស្រង់សម្តីលោក Ryabkov ដែលនិយាយកាលពីថ្ងៃពុធថា “ខ្ញុំសូមព្រមានប្រជាជនអឺរ៉ុប ឲ្យប្រឆាំងនឹងល្បែងវោហាសាស្ត្រដ៏គ្រោះថ្នាក់លើប្រធានបទនៃជម្លោះ”។

គួរបញ្ជាក់ថា រុស្សី បានប្តេជ្ញាសងសឹកលីទុយអានី ជាមួយវិធានការដែលនឹងមានផលប៉ះពាល់អវិជ្ជមានយ៉ាងធ្ងន់ធ្ងរដល់ប្រជាជនលីទុយអានី បន្ទាប់ពីប្រទេសនេះ បានរារាំងធ្យូងថ្ម លោហៈ សម្ភារសំណង់ និងបច្ចេកវិទ្យាទំនើប មិនឲ្យដឹកពីរុស្ស៊ីដីគោកដល់តំបន់ Kaliningrad៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ មេទ័ពហ្វាំងឡង់ ប្រកាសត្រៀមធ្វើសង្គ្រាមជាមួយ រុស្ស៊ី