មេដឹកនាំប្រទេសមួយនៅ អាស៊ាន បញ្ជាក់ពេលវេលាជួបទាំងលោក Putin និង Zelensky

លោក Joko Widodo ប្រធានាធិបតីឥណ្ឌូនេស៊ីដែលបច្ចុប្បន្នប្រទេសរបស់លោកធ្វើជាម្ចាស់ផ្ទះសម្រាប់កិច្ចប្រជុំក្រុមប្រទេស G20 ទំនងជានឹងទៅបំពេញទស្សនកិច្ចនៅអ៊ុយក្រែន និងរុស្ស៊ីនៅចុងខែនេះ ។

ទន្ទឹមនោះ រដ្ឋមន្ត្រីការបរទេសឥណ្ឌូនេស៊ីលោកស្រី Retno Marsudi បានប្រាប់អ្នកសារព័ត៌មានកាលពីថ្ងៃពុធថា លោក Joko នឹងជួបជាមួយប្រធានាធិបតីអ៊ុយក្រែន Volodymyr Zelensky នៅទីក្រុងកៀវ និងប្រធានាធិបតីរុស្ស៊ីលោក Vladimir Putin ក្នុងទីក្រុងមូស្គូសម្រាប់កិច្ចពិភាក្សាលើកដំបូង ។

លោកស្រី Retno បាននិយាយថា ស្ថានភាពជុំវិញអ៊ុយក្រែនគឺមិនធម្មតា និងស្មុគស្មាញ ប៉ុន្តែលោក Joko បានសម្រេចយកជម្រើសនេះដើម្បីធ្វើការរួមចំណែកជំនួសឲ្យការនៅស្ងៀមសម្រាប់តំបន់អាស៊ាន ។

លោកស្រីបញ្ជាក់ថា ប្រធានាធិបតីកំពុងបង្ហាញការអាណិតអាសូរចំពោះវិបត្តិមនុស្សធម៌ ហើយនឹងព្យាយាមចូលរួមចំណែកក្នុងការដោះស្រាយវិបត្តិស្បៀងអាហារពិភពលោកដែលបណ្តាលមកពីសង្រ្គាម ។

គួរបញ្ជាក់ថា ប្រសិនបើរឿងនេះកើតឡើងមែននោះ លោក Joko នឹង​ក្លាយ​ជា​មេដឹកនាំ​អាស៊ី​ដំបូង​គេ​ដែល​ធ្វើ​ទស្សនកិច្ច​ប្រទេស​ទាំង​ពីរ​ ចាប់​តាំង​ពី​រុស្ស៊ី​បានលុកលុយ​អ៊ុយក្រែន​ក្នុង​ខែ​កុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Zelensky ឲ្យពិភពលោកដាក់ទណ្ឌកម្ម រុស្ស៊ី ២៤ ម៉ោងក្នុងមួយថ្ងៃ