អ៊ុយក្រែន ត្រូវការពេលមួយទសវត្សរ៍ដើម្បីបោសសម្អាតមីន និងគ្រឿងផ្ទុះ ក្នុងប្រទេស

មន្ត្រីសេវាសង្គ្រោះបន្ទាន់បាននិយាយថា អ៊ុយក្រែននឹងត្រូវការយ៉ាងហោចណាស់មួយទសវត្សរ៍ដើម្បីបោសសម្អាតមីន និងគ្រឿងផ្ទុះទាំងអស់ចេញពីដីរបស់ខ្លួន នៅពេលដែលសង្គ្រាមជាមួយរុស្ស៊ីបានបញ្ចប់ ។

មន្ត្រីបាននិយាយថា អ៊ុយក្រែនបានគ្រប់គ្រងការបោសម្អាតផ្ទៃដីទំហំ ៦២០ គីឡូម៉ែត្រការ៉េដែលពោរពេញទៅដោយគ្រឿងផ្ទុះរាប់ពាន់គ្រាប់ រួមទាំងគ្រាប់បែកចំនួន ២,០០០ គ្រាប់ដែលបានទម្លាក់ពីលើអាកាស ប៉ុន្តែផ្ទៃដីជិត ៣០០,០០០ គីឡូម៉ែត្រការ៉េនៅតែត្រូវបានគេមើលឃើញថាផ្ទុះទៅដោយគ្រឿងផ្ទុះ ។

លោក Oleksandr Khorunzhiy អ្នក​នាំពាក្យ​សេវា​សង្គ្រោះ​បន្ទាន់​រដ្ឋ​អ៊ុយក្រែន​បាន​និយាយថា “យើងនឹងចំណាយពេលរហូតដល់ ១០ ឆ្នាំ ដើម្បីធ្វើការបោសសម្អាតមីន ដោយ​សារ​យើង​មិន​ដឹង​ថា​នឹងមាន​អ្វី​កើត​ឡើងទៀត​នៅ​លើ​ទឹកដីរបស់យើង ខណៈ​ការ​ប្រយុទ្ធយ៉ាង​សកម្ម​កំពុង​បន្ត​នៅ​ពេល​នេះ” ។

ជាចុងក្រោយមន្ត្រីរូបនេះបានប្រាប់សន្និសីទសារព័ត៌មានមួយថា “យើងសាកស្រមៃមើលថាតើរហូតមកដល់ពេលនេះគ្រាប់បែក ក៏ដូចជាគ្រឿងផ្ទុះចំនួនប៉ុន្មានហើយដែលសត្រូវបានទម្លាក់មកលើទឹកដីរបស់យើង ។ វាមិនតិចនោះក្នុងទេរយៈពេល ៤ ខែកន្លងមកនេះ” ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ចាត់ទុកជា “ប្រតិបត្តិការយោធាពិសេស” បានអូសបន្លាយពេល ៤ ខែមកហើយ ចាប់តាំងពីផ្ទុះការវាយលុយកនៅថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ អឺរ៉ុប និងណាតូកំពុងប្រមូលផ្ដុំប្រទេសសម្ព័ន្ធមិត្តធ្វើសង្គ្រាមជាមួយ រុស្ស៊ី