ណាតូ បង្កើនកម្លាំងទ័ពប្រុងជើងការខ្ពស់ ពី ៤ម៉ឺនដល់ ៣០ម៉ឺននាក់ (មានវីដេអូ)  

អង្គការណាតូ នឹងបង្កើនចំនួនកងកម្លាំងប្រុងជើងការខ្ពស់ពី ៤០ ០០០នាក់ទៅដល់ ៣០០ ០០០ នាក់ដែលជាផ្នែកនៃការកែកុនធំបំផុតចំពោះផ្នែកការពាររបស់សម្ព័ន្ធភាពនេះ ចាប់តាំងពីសង្គ្រាមត្រជាក់មក។

អគ្គលេខាធិការអង្គការណាតូ លោក Jens Stoltenberg ក៏បានបញ្ជាក់ដែរថា សម្ព័ន្ធភាព នឹងពង្រីកការដាក់ពង្រាយកងទ័ពនៅតាមបណ្តាប្រទេសណាតូ ដែលស្ថិតនៅជិតបំផុតជាមួយរុស្ស៊ី។

ការសម្រេចចិត្ត នឹងត្រូវប្រកាសនៅក្នុងកិច្ចប្រជុំកំពូលដ៏សំខាន់មួយនៃសម្ព័ន្ធភាពណាតូ ដែលមានសមាជិក៣០ប្រទេស ក្នុងសប្តាហ៍នេះនៅទីក្រុងម៉ាឌ្រីដ នៃប្រទេសអេស្ប៉ាញ ខណៈជំនួបនេះនឹងប្រព្រឹត្តទៅក្រោមស្រមោលនៃសង្រ្គាមរបស់រុស្ស៊ីនៅអ៊ុយក្រែន។

លោក Stoltenberg និយាយថា “យើងនឹងផ្លាស់ប្តូរកម្លាំងឆ្លើយតបរបស់អង្គការណាតូ ហើយបង្កើនចំនួនកងទ័ពប្រុងជើងការខ្ពស់របស់យើង ឲ្យលើសពី ៣០០ ០០០នាក់”។

គួរបញ្ជាក់ថា កងទ័ព​ឆ្លើយតប​របស់​អង្គការ​ណាតូ​បច្ចុប្បន្ន ​មាន​ទាហាន ​នាវិក និងកងកម្លាំង​អាកាស​ប្រមាណ ​៤០ ០០០នាក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky

ចុចអាន៖ កូរ៉េខាងជើង ចោទអាមេរិក ថា កំពុងបង្កើត ណាតូអាស៊ី